KellyChu - 教育局邀議員齊考察陝西　葉劉：似旅遊套餐｜Executive日記

現時中學公民與社會發展科，要安排學生到內地考察，教育局亦邀請立法會議員喺12月2日至5日，同學生一齊體驗陝西歷史文化及航天科技考察團。但議員們就質疑局方擅自決定，冇問過佢哋。新民黨主席葉劉淑儀（見圖）更形容，行程安排「似旅遊套餐」。

考察團暫定行程安排參觀包括陝西歷史博物館、大唐不夜城、西安鐘樓、兵馬俑等名勝。葉太指，「睇落似旅遊套餐、含金量好低」，又問教育局係咪唔記得咗12月10日係選舉，考察團對區議會助選工作十分不公道。

建築、測量及都市規劃界議員謝偉銓亦質疑，點解佢哋對行程安排冇話語權，咁樣動用公帑又有何得益。教育事務委員會主席、經民聯議員梁美芬就表示，已有9名議員願意參加，認為行程可改動機會唔高。議題最終要推遲到下星期討論。

Kelly Chu