KellyChu - 英Sir親自坐鎮 大派利是股 《星級創富》教你龍年投資賺錢大計｜Executive日記

龍年嚟到，股民梗係想喺新春開個好年，究竟港股有冇機會由谷底反彈呢？定係轉戰美股更加實際？與其自己心大心細，計Kelly話不如參考下專家意見！《星島頭條》全新財經金融節目《星級創富》將於年三十（2月9日）推出「龍年投資理財部署」，由本地著名基金經理黃國英（英Sir）坐鎮，送上新一年投資策略以及理財貼士！

Kelly收到風，英Sir除咗拆解中港近期市況，更會大派龍年利是股畀讀者，等大家新春開個好年，財源滾滾來！節目梗係唔少得有英Sir最愛嘅美股，近年升到飛起，搞到Kelly都想知嚟緊仲有冇得升、要唔要順勢入手AI概念股。聽聞英Sir仲會透露投資倉位嘅配搭，排出攻守兼備陣式！想喺新春贏到開巷，聽日齊齊睇《星島頭條》嘅《星級創富》啦！

《星級創富》節目網頁：qrcodes.pro/qufD

Kelly Chu