KellyChu - 港鐵靚女AI大使鰂魚涌站解疑難 | Executive日記

港鐵今年踏入45周年，主席歐陽伯權預告嚟緊將會有好多節目推出，今年亦都會善用科技服務市民，其中喺鰂魚涌站設立咗AI車站服務員，為乘客解答各類問題，完成試驗後有望喺更多車站投入服務。

　　鰂魚涌站嘅AI車站服務員係一位靚女姐姐（見圖），乘客喺螢幕上點擊對話便可向佢提問，佢會為你解答站內設施位置等問題，例如銀行櫃員提款機、洗手間及手機充電設施係邊，又可以要求真人提供協助。港鐵話呢位AI姐姐一路學習緊，提供嘅資訊會越來越準確，方便為乘客提供所需協助。

　　港鐵除咗不斷提升本地車站服務，亦積極經營海外市場。歐陽伯權指，港鐵喺澳洲悉尼嘅西南線，已進入最後測試階段，仲有兩、三個月就可以正式投入服務，而喺深圳興建中嘅13號線亦有望好快完工。

　　佢回憶年輕時，經常喺報紙睇到批評港鐵工程搞到彌敦道烏煙瘴氣，如果唔係當年大家忍受，唔會起到一個咁好嘅地鐵網絡，今時今日嘅交通便會好麻煩，承諾會繼續諗多啲新嘢，服務市民。

　　港鐵企業事務及品牌總監蔡少綿分享港鐵喺環保方面嘅工作，指顯徑站為綠色車站試點，站內裝有各式各樣嘅太陽能板，無論窗上定地板都可以收集再生能源；乘客每日搭嘅列車，喺煞車一刻也能產生能源，收集起來，每日取得嘅能源大概係全港7700戶全年用電。
KellyChu