KellyChu - 財爺大日子戴淺橙色領呔 七朵金花議員「晨曦色」撐 | Executive日記

新年度《預算案》封面選用為晨曦色調嘅淺橙色，多位立法會議員昨日就夾好dress code，以晨曦色調衣着出席會議。財政司司長陳茂波也戴上淺橙色領呔發表預算案。

　　民建聯議員葛珮帆喺Facebook上載同其他女議員於會議廳嘅合照，話大家以晨曦色彩迎接財政預算案。行政會議召集人、新民黨主席葉劉淑儀上身穿粉橙色樽領衫及西裝外套，下身配深灰色西裝裙和尖頭高跟靴，一貫大方優雅風格。

　　葛珮帆與另一位民建聯議員林琳及新民黨議員容海恩就選擇粉紅色外套，簡單大眾嘅配搭，延續農曆新年嘅喜慶。經民聯副主席梁美芬同選委界立法會議員簡慧敏以晨光第一線嘅鮮橙色迎合主題，分別選穿皮褸和頸巾。

　　新民黨立法會議員陳家珮嘅深色格仔褸雖然唔太「晨曦色調」，但桃紅色嘅樽領毛衣都頗為搶鏡，勉強融入大家嘅色系。

　　除咗議員們精心打扮，多位局長和官員都唔失禮，律政司司長林定國及房屋局局長何永賢都分別以淺橙色領呔和上衣現身。

　　陳茂波最後用咗約兩個半鐘發表新年度《預算案》，佢喺結語指出，雖然2024年仍充滿不確定性，但回望香港過去幾十年嘅發展，可見路徑縱有高低起伏，總是導向美好未來，今年預算案封面顏色代表破曉晨曦，迎來希望、懷抱信心，蘊藏着對更和諧團結嘅期盼。
KellyChu