KellyChu - 土耳其盃首兩場表現出色 港女足阿Mi膺最佳門將｜Executive日記

香港女子足球代表隊上月出戰「2024土耳其盃」，雖然3戰全敗，不過門將吳卓蔚（阿Mi）喺首兩場表現出色，輸咗比賽，但贏得最佳門將獎項。阿Mi話：「係呢3場比賽入面，睇得出我哋對比人哋嘅速度同碰撞程度係差啲，不過我哋用意志搭夠！」佢強調，今年會繼續努力，稍後會返日本，爭取東北女子足球聯賽（第2級）岩手斑馬女子隊嘅新合約。阿Mi加油！

　　港女足喺今次土耳其盃3場比賽，分別以0:1不敵科索沃、0:2負印度、0:2輸給愛沙尼亞。阿Mi喺前兩場把關，而隊友梁蔚雅就喺最後一場守龍，盡力抵抗對手。贏得最佳門將獎項嘅阿Mi認為，港隊一直喺度進步，但仍然可以更好，「我自己要求高少少，覺得未有勝仗所以唔算順利，不過整體嚟講，港隊係進步中。所以接下來嘅比賽希望會順順利利。今年港隊無大型比賽，但會有國際友誼賽，希望可以取得至少一場勝仗，亦都希望自己繼續努力。」
KellyChu