KellyChu - 驚蟄「打小人」驅瘟神　鵝頸橋底「啪啪聲」不絕｜Executive日記

  昨日係廿四節氣中嘅「驚蟄」，按傳統習俗，唔少市民會「打小人」驅走瘟神。銅鑼灣鵝頸橋天橋底都人山人海，小妹午飯時間貪過癮去現場睇下，真係熱鬧到好似「趁墟」！現場「啪啪聲」此起彼落，有市民甚至大排長龍2個鐘打小人，都在所不惜。而高峯期有近200人喺橋底！唔少市民都話，希望打完小人後，事事順利。

　　現場打小人收費50元一次，幫襯嘅男男女女，不乏青年，而為咗等候心儀小人婆，有市民甚至排隊等兩小時都在所不計。劉小姐去年首次打小人，今年再接再厲，「上年做完覺得事事順利，今年再嚟，所求都係同上年一樣，打咗小人，心情好啲，事事順利。」

　　家庭主婦張女士則係今年首次打小人，「想所有嘢都順順利利啦，小朋友學業進步，呢幾年有疫情，都係希望身體健康，事事順利，因為要誠心，等幾耐都要。」
KellyChu