KellyChu - 恒地辦《聚光：傳承到未來》展覽 8女藝術家以光為靈感創作｜Executive日記

為響應藝術三月，恒基地產旗艦商業發展項目The Henderson，昨日趁三八婦女節宣布舉辦《聚光：傳承到未來》展覽，呈現8位嚟自唔同文化背景嘅女性藝術家作品，佢哋以光為靈感，點亮大家對日常生活、記憶及個人身份嘅重新定義。

　　8位女性藝術家之中，包括嚟自英國嘅Liz West和德國嘅Jacqueline Hen，都係第一次來港參展。Liz嘅作品《Our Colour Reflection》以溫暖嘅橙紅圓鏡作主體反射光線，從而令觀者進入一個獨特嘅思考空間。Jacqueline則帶嚟藝術裝置作品《Off Grid》，用鏡子同埋網格形狀嘅燈光，營造明暗交錯嘅空間錯覺。 

　　恒基租務（一）部總經理兼HART創辦人李敬恩指，The Henderson將於2024年秋季揭幕，今次展覽係作為揭幕嘅前奏，展覽主題以文化偶像及建築大師扎哈．哈迪德（Zaha Hadid）勇於創作和突破傳統嘅精神作為啟發，呢種精神就好似曙光一樣，打動咗好多後代嘅創作者，同時亦深深融入The Henderson項目。

　　展覽昨日起於中環H Queen's地下免費開放予公眾參觀，將持續展出至4月6日。此外，恒地喺中環新海濱三號項目，亦設有全長220米嘅戶外藝術圍板「Realising Central Cityscapes」，展示兩位本地藝術家趙綺婷及林雅儀，以不同風格及繽紛嘅色彩，繪出嘅城市景觀。
KellyChu