KellyChu -轉廢為能 果蔬鮮甜又健康 「再生農作物」食得滋味｜Executive日記

美心集團近年積極推動可持續發展，2年前已有計劃同本地農莊合作栽種作物，期間發掘到實踐「再生農業」嘅鴻日農莊。農莊唔用任何農藥和化肥，只用廚餘就種到美味果蔬，其生產嘅作物，今年正式引入美心旗下近70間餐廳，等大家可以一嘗天然無添加嘅滋味。小妹近日就親身試過鴻日農莊出品嘅車厘茄同青菜，真係鮮甜又健康！

　　坊間盛行有機農業多年，再生農業小妹都係第一次聽，但原來外國已流行多時，分別係再生農業更注重生態系統，重視土壤健康及水和肥料嘅使用，以永續方式耕作。鴻日農莊就選擇用餐前廚餘，例如芒果皮、豆渣、咖啡渣和魚骨等，製作天然酵素種植農作物，除咗令作物更天然健康，同時保護緊農莊水土。

　　因為廚餘酵素可強化土壤營養、防止害蟲，農莊仲因應唔同季節種植時令作物，等土地透過替換不同作物，養生調息。

　　另外，美心現時已有多間唔同類型餐廳，用再生農業嘅農作物入饌，包括中菜館翠玉軒、八一漁八，西餐廳COVA、simplylife，日式餐廳中目黑、帯広はげ天、魚治、神戸石田屋焼肉、燒肉火蔵，咖啡店星巴克以及快餐店美心MX、can.teen、美心Food2、Deli-O等。

KellyChu