KellyChu - Chill想放鬆祭邀大家「唞一唞」長沙灣海濱設豆袋沙發放空 | Executive日記

生活壓力大，唔少香港人有失眠或焦慮，為促進了解及關注精神健康和睡眠健康，發展局和海濱事務委員會聯同香港遊樂場協會舉辦「Chill想放鬆祭」，第一波今個周末喺長沙灣海濱花園舉行，等大家可以喺海濱自然景色下，坐上紓壓豆袋沙發，盡情攤唞放空！

　　睡眠同健康息息相關，而忙碌嘅都市男女好多時都難有優質睡眠時間，甚至受失眠影響，長沙灣海濱花園「Chill想唞一唞」活動，就以「睡眠健康」為主題，於海濱長廊下嘅「放空裝置體驗區」擺放一系列豆袋沙發，等市民「見攰即唞」。

　　攤唞之餘又可以參加「睡眠形態測試」，了解自己嘅睡眠質素，認識更多優質睡眠資訊及小貼士。現場亦設工作坊包括「五感放鬆工作坊」及「酒精墨水畫班」，以及筋膜放鬆棍班、筋膜刀班、動物流 (Animal Flow)、及頌缽體驗班。

5月將舉行「發吽哣大賽」

　　另外，「Chill想放鬆祭」下個月將於茶果嶺海濱公園及灣仔「水上運動及康樂主題區」登場，其中，茶果嶺海濱公園將舉辦「發吽哣大賽」，賽者要喺60分鐘內一直保持放空狀態，爭奪「最強發吽哣」稱號！希望鼓勵各位都市人，唔需要對適度嘅「休息」感到恐懼，調整緊湊生活步調，齊齊關注精神健康及情緒健康嘅重要性。

　　「Chill 想放鬆祭」部分活動須預先報名，有興趣不妨上專頁了解吓喇：https://www.popticket.hk/chill-relax-festival2024

KellyChu