KellyChu - 食用花與香草展下周一香港公園鬥靚 | Executive日記

部分花同香草可以入饌，Kelly知道唔少朋友仔都會喺屋企嘗試栽種呢類植物，既可怡情又可食用。香港公園霍士傑溫室下星期一開始，會舉辦食用花與香草展覽，將展出500多株唔同形態嘅春季食用花與香草，介紹其特徵、栽種要點及繁殖方法，想了解更多相關植物知識嘅讀者唔好錯過喇。

　　香港嘅春天氣候溫和，日照時間逐漸延長，適合唔同種類嘅食用花和香草生長。是次展覽展出30多種、500多株春季食用花與香草，包括芳香萬壽菊、小木槿、旱金蓮、琉璃苣、金盞花及多種香草等，讓市民有機會近距離觀賞各種花草嘅美態。

　　其中芳香萬壽菊香氣濃郁，不僅可當作花卉觀賞，花同葉都可以食用，嫩葉既可泡茶，又可用於烹調，用途廣泛，同時屬於容易種植嘅短日照植物，能夠適應半遮陰環境，只須適度澆水，已能花葉茂盛。

　　至於香草，潮濕嘅春天就特別適合薄荷科植物生長，常見種類有綠薄荷（又稱留蘭香薄荷）、胡椒薄荷、柚子薄荷等。

　　展覽內有展板介紹咁多種植物嘅特徵、栽種要點及繁殖方法，以增加市民對食用花草嘅認識。展期由4月22日至6月10日結束，每日上午9點至下午5點，喺中環紅棉路19號香港公園霍士傑溫室舉行，免費入場。

KellyChu