KellyChu - 陳水扁重申：04年遭槍擊無自導自演 | Executive日記

　　特朗普競選造勢時遭到槍擊，令小妹不禁回想起2004年3月19日，台灣前領導人陳水扁同樣於街頭造勢時，被子彈擊中腹部受傷。事件令原本處於劣勢嘅陳水扁，以些微票數成功連任。

　　陳水扁噚日受訪表示，聽到特朗普中槍嘅消息非常震驚，亦令佢回想起319槍擊案嘅遭遇，對於該案至今都冇一個交代，佢感到非常遺憾，而自己事後被扭曲、抹黑成係自導自演，強調完全冇呢回事。

　　案發當時為選民投票前一日，陳水扁同副手呂秀蓮乘着一輛吉普車喺台南掃街拜票（見圖），當車隊轉入金華路時，現場響起鞭炮聲迎接二人，與此同時卻出現兩下槍聲，一槍打中呂秀蓮膝蓋，另一槍擦過陳水扁腹部。一年後，當局指疑犯已畏罪自殺，生前留低遺書承認犯案，惟已被家屬銷毀。真相成為台灣政壇永遠嘅謎。

KellyChu