KellyChu - 內地客拆禮物見霉　旅發局火速「補鑊」獲讚 | Executive日記

　　旅發局積極透過唔同盛事吸引旅客訪港，並喺關口派問卷收集旅客對香港旅遊業嘅意見，不過最近有位內地女子喺小紅書分享，話佢完成相關問卷後獲贈一份小禮物，拆開後驚見裏面嘅手機扣環發霉（見圖），旅發局留意到貼文後，主動私訊事主致歉，更表示願意補送小禮物，獲事主大讚反應快。

　　事主憶述，佢喺6月尾過關返深圳嘅時候，獲旅發局人員邀請完成一份約3分鐘嘅問卷調查，問題主要圍繞旅客訪港原因、時長、消費模式，以及有冇聽過本港一些大型展覽活動等。事主指，大部分問題佢都給予「中等」評價，惟服務水平有待改善。

　　完成問卷後，工作人員送上一份小禮物以示謝意，事主直言當刻感到驚喜，但係返屋企拆開禮物盒時，竟發現裏面嘅手機扣環發霉，認為局方送出禮物前至少檢查下狀況。旅發局人員好快就注意到相關討論，並主動私訊事主致歉，更表示願意補送小禮物，事主大讚旅發局辦事速度快，希望佢哋繼續努力。

KellyChu