KellyChu - 麥當勞推「大學課程」 讀完做總經理 毋須繳付費用 為員工提供晉升之路 | Executive日記

昨天係DSE文憑試放榜日，各位同學仔已經開始尋覓升學之路，為未來作打算，而香港麥當勞作為全港最大青年僱主之一，則為員工提供另類出路，開辦與學士學位同等資歷嘅《管理發展專業文憑（資歷架構第5級）》，完成課程後可直接成為餐廳總經理。

　　香港麥當勞係本地飲食界首間開辦資歷架構第5級課程嘅企業，2年嚟已有近250名餐廳總經理成功畢業，報讀課程員工毋須繳付任何費用，成為見習經理後，最快30個月就可以晉升餐廳總經理。香港麥當勞本年度更提供近5000個青年就業機會，為DSE畢業生提供另類出路。

　　星光行餐廳總經理Jimmy本為中五畢業，現以26歲之齡管理每年營業額過千萬嘅分店餐廳。佢去年透過課程取得與學士學位同等學歷，坦言自己唔係一個讀書好叻嘅人，但只要有心做，公司便會提供資源，喺課程中亦明白到對同事需要實踐信任和尊重，「當同事提出新idea，要給予鼓勵，先可以令佢哋感到受信任。」課程令佢學到人際溝通技巧，幫助新同事融入工作環境。

　　今年畢業嘅Milk曾修讀酒店文憑，佢認為麥當勞提供更多實戰技巧，更勝其他課程，又指課程教導何為優先次序，「有突發事嗰陣我可以更冷靜去處理，同點去保護員工安全。」

　　而去年畢業嘅Suki指，麥當勞比起其他企業，提供更多資源予員工，包括工作假期及周年晚宴。Suki工作假期曾前往韓國嘅麥當勞，體驗前線工作。

KellyChu