胡慧沖 - 曼谷拜神新趨勢 | 筆泰沖動

　　提起泰國曼谷拜神，講緊係神唔係佛……舉例四面神、象神等一眾印度婆羅門教嘅天神，其實在購物區Ratchaprasong之中，早年已經有七位天神可以畀大家去拜，但最近更增加至十位，當中四面神依然係最香火鼎盛。

　　而在四面神對面的Gaysorn Centre上面，就有一位印度女天神，很多本地年輕人都會去拜，拜的方式有點特別：大部分人會穿着粉紅色衣服去拜，甚至用粉紅色的香燭、花、甜品去拜，求幸運、財富或姻緣……而更加新的地方，就係一眾遊客都喜歡的Big C，今月初開始樓上6樓就供奉了一尊印度婆羅門教最高地位的濕婆天神。這個地方完全是由Big C商場管理，裏面亦都有香燭發售，一傳十、十傳百，現在已經很多泰國朋友慕名去拜。根據網上資料，濕婆天神是婆羅門教中最高層次、最威猛的一個神，基本上萬樣大事都可以保佑到你。但個人認為要得神保佑，首先第一係自己都要努力，第二唔可以害人，同埋多做善事先有機會，否則的話，神係唔會幫一啲衰人嘅！

　　於是乎下次當大家去到曼谷這個Ratchaprasong商業區，尤其是去Big C買嘢，都可以順道上去拜吓神，拜得神多自有神庇佑！其實對面仲有愛神同象神，亦都可以去拜埋。

  泰國人傳統有個習慣，就係一日之內九寺連環，去九間佛寺拜，作為遊客的我們一天之內亦可以在這區拜九個神。唔係十個咩？其實當中有一個係位於某商場頂樓的私人地方，普通人不能上去的，所以一般人只能去拜九位天神，祝大家好運！

胡慧沖