胡慧沖 - 執靚個樣 | 筆泰沖動

　　所謂醫美近年越來越流行，以往有啲男藝員唔好意思俾人知道打過美容針，但而家其實就算你唔講，見到你個樣都好明顯知你去打咗。當然以前手術或藥物未必咁先進，成效偶有參差，但而家可以話成功率已大大提升，效果更理想。

　　其實呢一方面喺泰國都好有名，可能因大家習慣吹捧韓國醫美，較少人會留意到泰國呢一方面嘅成就，但君不見泰國男仔女仔越來越靚仔靚女？甚至乎男變女、女變男，個樣都完全呃到人，全因為醫美嘅功勞。喺泰國街上總會見到好多有關打美容針嘅診所，甚至乎各大商場，都會有一層半層劃分專區畀醫美診所開舖，可想而知需求有幾大。

　　最近經朋友介紹去執過個樣，打咗啲針，之後朋友話當堂後生咗10年，真係多謝大家誇獎！當然身體髮膚，受之父母，針打落去會有少少痛，同埋始終呢類醫美唔能夠排除有機會走樣，但理論上如果醫生經驗豐富嘅話，失手機會率都唔會太高。

  其實剛剛光顧咗一間K字頭醫美診所，喺泰國都好出名，除咗醫美，更加會提供相關手術，亦有自己嘅醫生、護士團隊及手術室。一啲涉及大型手術小弟就唔推介畀大家，因為要開刀嘅事情總會存在風險，但一般普通打針，打完出來隔兩日已經容光煥發、耳目一新，有興趣都不妨可以試試。

  唔清楚價錢相對香港會唔會平啲，但相信工多藝熟，這裏醫生替客人打美容針應該比香港的更富經驗，因為價錢唔貴而且幾普遍。大家睇睇我係咪真係靚仔咗？

胡慧沖