星期六

小妹公司一向都係行５天工作制。公司同事大家都好醒目，逢星期五都會自動自覺將所有緊急工作做好晒，唔好等腦細外國人有藉口叫我地星期六返去開ＯＴ。

但係有時真係道高一尺，魔高一丈，佢要搵你、煩你，你真係點避都避唔過。好似今日咁，小妹又中彈喇～

話說今日，約咗剛剛炒咗老細魷魚，而家待業緊嘅小學同學行街食飯。點知，晏晝三點幾就收到外國人嘅追魂 call ，最衰係長途電話，冇來電顯示，唔係一定唔會接聽。

佢第一句就單刀直入：「喂～simple 呀～我Ｅ咗份報告去你個私人 email 呀～你而家可唔可以幫我睇吓有冇問題呀？」佢好理所當然咁，以為小妹一個星期７日都服務佢咁樣喎！

「唔得喎～我唔係屋企喎～而家睇唔到呀！」小妹都答得好理直氣壯，因為今日係非辦公日嘛！話之你係老細丫！

佢可能聽到小妹語氣唔係太好，講野都禮貌返少少：「咁呀～你返到屋企可唔可以打個電話比我呢？」

「我好夜先會返屋企架喎！！！」呢句好明顯語氣更差喇！

「咁呀～咁算喇！我聽日再搵你喇！」

抵死！下次要問野就星期五問丫嘛～

我以為咁就無事喇～點知呢個外國人，仲係死心不息。隔咗十分鐘，又再打電話嚟！

「喂～simple 呀～唔好意思呀！想問你少少野呀！」今次都好，起碼識講句唔好意思！

「咩呀～我唔一定記得架喎！」你估小妹個腦係電腦咩！不過見你咁焦急，都費事留難你。好果記得，一定會答你，費事比你煩足成日，搞到行街血拼都唔安落喇！

「我想知我地同ＡＢＣ公司嗰單ＸＸＸ事點呀！」

「哦～嗰件事咪上個月搞掂咗囉～上個星期我仲同ＡＢＣ公司講好晒架喇！ＯＫ晒喇～無問題喎！放心喇！」

「咁得喇～唔該晒！」

都算佢識講返句唔該！

而家唯有希望佢唔好聽朝一早打嚟嘈醒我喇！！！