山高皇帝遠之謀朝篡位

話說，喺好耐好耐以前，某國皇帝開發咗一個殖民地，呢位皇帝貴人事忙，擁有龐大領土，跟本無暇管理小小嘅殖民地。於是，皇帝重金請來未瞓醒做小小殖民地之執掌人。

未瞓醒一人當關神勇非常，勇往直前遇敵殺敵。可惜人如其名，未瞓醒以遊魂嘅狀態去管理呢個小小殖民地，雖然用盡全力，但始終力不從心。最後，仲搞到健康欠佳，未瞓醒經過細心衡量，為免自己積勞成疾，於是向皇帝提出請辭。

未瞓醒話晒都係一個殖民地嘅代言人，當然唔可以好似某ｄ政府高官咁話退就退喇！皇帝費刹思量，要求未瞓醒喺未搵到新代言人之前繼續留任，而未瞓醒亦都願意幫忙，直至有新代言人出任才離開。

就喺呢段時間，一個低層官員黑面神，可能受到早前熱爆電視劇嘅影響---正所講“未登阿姐位，先置雞毛掃”，佢自持加入殖民地最耐，又自以為可以擔此重任，於是揸住雞毛當令箭，搞咗好多小動作，令到一眾官員叫苦連天。後來，黑面神所做之惡行，一一傳到欽差大臣外國人耳中，外國人二話不說，搵黑面神傾計，問佢發生咩事，點解要成日挑戰未瞓醒嘅主權管治，大家一言不合，黑面神仲發晒脾氣揚言要辭官歸故里咁話。

外國人立即將呢件事向皇帝佈告，皇帝大叫“可怒也”～～～皇帝發報聖旨，豈可被一個低級官員搞風搞雨，皇帝貫徹“去者不留”嘅態度，表明對黑面神不作挽留。

黑面神一直以為自己在皇帝心目中地位非凡，斷斷估唔到呢次請辭會弄假成真，一番謀朝篡位之苦心付諸東流，更自憐喪失一份以逸待勞、唔使點做嘅工作。可惜，一切已成事實，只能大嘆一句後悔莫及，嗚呼哀哉矣！

最後，黑面神只能以手搥住心口，刀仔拮住大脾咁離開殖民地囉！