預告 ---- 龔耀輝

恒指收報17199點，下跌276點，成交609億元。如果你是逆向思維的信徒，今時今日個個叫你忍手唔好買，可能反而是入市良機，你夠唔夠膽？

最近急升的股份之中，有許多是配股後股價上升。你咁聰明，應該知道是賣殼活動，有機會正在進行。

OK，如果要逆向思維，就要從這類活動入手，思考究竟市場上正在發生什麼事情。一隻殼，通常有兩類主人。一是手上大把貨，善價而沽。二是由細湊到大的親生老豆。若非意興闌珊，就是經營不善，要將兒子送給人養。

如果是殼主，手上大把貨，當願意割愛，若非實力不足，就是價錢合理，亦可以是找到好歸宿，能夠拍住一齊上。實力不足就要賤價出售，但最近顯示出的價錢並非此類。

如果買賣活躍是因為到價或遇到好歸宿，就表示有人對後市樂觀，至少對炒股票有興趣，並非一潭死水。又或者並非只買藍籌股，其他股份免問。

如果是親生老豆，就代表終於捱唔住，銀行「閂水喉」的確令很多生意人叫苦連天，無啖好食。守唔住，唯有將最後防線賣埋套現還債。

兩者結合是什麼訊號？生意難做、借錢困難的情況已到生死關頭。但一雞死一雞鳴，市況活躍，價錢到價，殼主走得舒服，買家有足夠時間部署下一輪旺市。如果股市行先經濟六個月，賣殼活動隨時行先股市三季。

經濟是否有起色，無人敢講。但大市將會翻生，轉世為人，已經有人用錢同大家預告。