反思 --- 龔耀輝

6月14日，時晴時雨，對於計劃戶外活動，零舍無癮。口痕友話，天氣仲蠱惑過股市，上晝一陣雷暴大雨，嚇怕一眾計劃外出人士；下晝來一個陽光普照，叫人咬牙切齒。天氣同股市一樣，就是將你的計劃打到亂晒籠。

早一陣子，究竟傳統智慧「長揸發達」這條橋還是否有效，成為不少財經專欄的題材。不單止香港，發明這條投資方程式的美國人，都質疑究竟長揸會幫你還是害你，尤其是大量美國的百年老店，例如通用汽車、花旗銀行及AIG等等，可以突然間不堪一擊，變成接近廢紙，長揸更加顯得有點兒戇居。

不過，我們這一代，作為仍要搵食，有排未上岸，冇時間長期望實大市的繼續努力一群，其實你沒有大多選擇。若非長揸，就是短炒，但你可以咩？你可以失驚無神，下午3點鐘，看見新地（016）從一百蚊回落，即時走貨？你可以在廿六蚊沽盡比亞廸（1211），看見隨後上三十四蚊而無動於衷？你又可以高位接過莊家股後，能夠在成交突然變薄時，成功把握機會走貨離場？若果答案全是否定，你只有繼續長揸等發達。

最弊是，飽讀詩書、對投資又有興趣研究的你，愈發覺你的腦筋是無用武之地。劉明康說：「股市反彈過快，我們要反思」；但其實，你在4月已經一早反思。不單只反思，還有反應，你開始沽貨甚至沽空，到頭來，你又要反思為何自己又一次輸錢。

你繼續反思，可能輸得更多。美國GDP有七成是個人消費。美國家庭，淨負債（現金扣除負債）是4萬億美元。信用卡拖欠比率，突破十八年新高，超過5.5%。你計來計去，美國經濟應該冇運行，而且這些數字資料，連你一個在十萬八千里外的小小香港人都知道，華爾街那班大鱷，應該比你更熟，亦應該與你有同一個悲觀結論。但何解，市場要你輸錢，叫你反問自己是否諗錯？

既然你冇時間，又冇得諗，唯一方法，除了揀選一些短時間內唔會執笠的股票長揸，唯有買樓當儲錢。簡簡單單，仲可以專心工作。你讀得書愈多，分分鐘令你輸得更多。