伸長隻手 ---- 龔耀輝

恒指收報18165點，跌333點，成交764億元。恒指星期五跟星期二已經可以相差千幾點，如果你上星期出門，今天剛剛落機，恒指近乎原地踏步。只要在錯誤時間睇好或睇淡，都一樣會受到懲罰。

奧巴馬政府決定要嚴控金融業，蓋特納與森默斯聯名在《華盛頓郵報》撰文，指出現行制度有五大問題，詳情可以自己上網睇。

五大問題，但背後理念只得一樣—將監管之手盡量伸長。不單止要伸長隻手去管場外衍生工具，又想跨國去管，主要的 counter-party 要管多啲，信用卡都要管，還要加力讓政府可以令金融機構安全解體，毋須被迫用納稅人金錢救駕。

每次有危機出現，都會帶來更多監管，例如上次 Enron 之後的 Sarbanes-Oxley。每次有新的監管，都會改變現有行業生態，未來又會有一次洗牌。

奧巴馬政府無論點改，有一樣金融業的弊端相信難以去改，就是金融高層人工過高的問題。

投資銀行一直是多勞多得，高薪人士必定是賺錢人士，從來沒有「死錯人」。但因為結構問題，金融高層人工與成績未必成正比（至少外界是如此感覺），難以改變。

金融行業有多種以表現掛鈎的薪酬指標，但指標是 mark-to-market。當水漲船高，計算花紅銀碼豐厚，即時「磅水」。即使後來跌價，mark-to-market 之後由賺變蝕，但從來沒有回吐機制，過往收多啲照樣袋袋平安。

只要今年沒有豐厚花紅，有能者就會跳槽，重新由頭計過。這現象永恒不變，有能者永遠是賺錢自己有份，輸錢由銀行負責。

用認股權證作為薪酬的大部分，以示激勵作用，大家同坐一條船，這亦未必行得通。投資銀行「晒士」太大，就算你識飛，都冇可能以一己之力推動股價。大家做同一行都懂得計數，日捱夜捱，用公仔紙出糧，冇人肯制，花紅最實際。所以，銀行大多爭相還清 Tarp money，要盡快回復薪酬正軌，否則叻人全部走清光。

通用汽車將會把旗下 Saab 品牌轉讓瑞典 Koenigsegg 車廠。這間廠聞所未聞，旗下出品的汽車，你自己上網睇睇，與 Saab 是兩回事。Saab 是有名有姓的品牌，出廠的汽車是有紋有路，但都沒有大廠肯接收。

Hummer 比 Saab 更加冷門，反而得到與車廠無關的內地民企垂青。做生意最強之道，就是估你唔到。