(河馬仔專欄)《全心支持蔡楓華演唱會 All 4 Ken 2011》第一場觀後感
2011/03/29 01:39:10 網誌分類: 娛樂
連場反應熱烈之《全心支持蔡楓華演唱會 All 4 Ken 2011》終於在3月26日開始第一場、在九龍灣展貿舉行。當日在排隊等穿梭巴的地方已經迫滿人、當然按小弟入場觀察所得、女性FANS的確較男性FANS多、如唔計一家大細來睇演唱會的觀眾群、的確係太太們的觀眾為多數、但請不要覺得意外、唔計小弟這位八十頭的八十後、在場內亦見得到一些年青人到場支持蔡楓華的演唱會。
在場外已見到一個又一個的慶祝花籃、上面亦見到唔少的熟識歌手名字呢。如劉德華、阮兆祥、周慧敏等等。
而演唱會場外亦有一些精品、這是演唱會常見的項目了。
當日在入場時有人士派發單張、小弟孤陋寡聞、原來蔡楓華已經有國際歌迷會了、在此祝願他的歌迷越來越多。
當日入場人數唔少、聽眾都非常有秩序地魚貫入內。在開場前已經人頭湧湧了。亦有不少觀眾拿住相機和親友拍照一番。
當然要講番演唱會呢。蔡楓華全晚都接近換了四五套衫、帶住黑超、設計上都幾啱佢以往『白馬王子』之形象。在開場前亦為日本大地震默哀了一分鐘、之後就見到蔡楓華出場了。
近兩個幾三個鐘的演唱會唔見有冷場、蔡楓華雖然在介紹時都有點緊張咬字有時會不夠清楚、但說話時都好有條理。而今次演唱會較其他演唱會有一些不同之處就是、台上與台下的交流係好多的、眼見阿KEN(即蔡楓華的英文名)有好多說話和在場觀眾傾談、而在這些對話中、睇得出阿KEN有兩件事好似都好期望、第一就係好想聽到台下的掌聲、第二就係好想係紅館開SHOW(因為在演唱會中已聽佢講過數次呢)
演唱會中大唱以往阿KEN的金曲、當中快歌的確唔少、在ENCORE前已唱約廿幾首、如『倩影』『困』『風中追風』『愛不是遊戲』、『青春三重奏』『IQ成熟時』『相愛亦相分』等等。
雖然嘉賓唔多、有一位廣州歌手先來唱了一首紅日、接住還有譚校長到場做嘉賓。猶記得當時都幾興一首曲填兩個唔同的詞給兩位歌手唱。(類似千千闕歌及夕陽之歌)、當晚就有蔡楓華唱『月蝕』及譚校長唱『酒紅色的心』、而兩位在台上都講唔少笑話、眼見蔡楓華都好講得笑、在過場中亦攪到幾好的氣氛、的確有台上的風範。
在中場中亦有一小段的深情對話、由以往的拍檔盧敏儀小姐做主持、當中講了不少阿KEN的往事外、亦講到一些在1985年發生的事、亦提及到他的母親的一些生活事。我附近都有些太太們睇完都有眼泛淚光呢。
除此之外、最為觀眾感到激昂就係佢所講做歌手的原因及需要的東西。他在台上提及了做人要有尊嚴、做歌手亦要敬業樂業。而他講的一點係小弟好記得的、他在台上說如有FANS在演唱會中送禮物如花的時候、應該自己親手接花之餘亦親自將花放好、這是做歌手應有的禮貌、的確係有敬業精神。
當然是次演唱會DANCERS唔少、亦有近兩隊BAND負責中樂及西樂的歌曲。雖然蔡楓華當然唔跳得好多、但台風及手部的GESTURE確係幾多變及幾有台型。論唱歌方面、一些年資長的歌星確是聲底夠厚、唱足全程唔覺有任何疲憊感之餘聲音亦同樣響亮。當然把聲和以往比較確實有少少變化、聽聽下覺得多了點大俠的味道、有點點秋官的影子呢。
到到encore階段有三首歌呢、『絕對空虛』『也許』等等都令歌迷留下一個美好的ending.『也許』記得除了蔡楓華唱之外、還有演"展昭"的何家勁唱過呢!
整個演唱會見得到蔡楓華唱歌的熱誠及率直之外、還感到佢對舞台的堅持。而他的唱功確是令歌迷津津樂道及滿意、而舞台設計的確較預期華麗、能夠看到一個有熱誠的演唱會、相信都好滿足了!
在此期望蔡楓華在未來的日子有機會能夠進軍紅館、在香港的樂壇再創高峰!
看板娘---Mary CHAN---對《全心支持蔡楓華演唱會 All 4 Ken 2011》第一場之評分:
*(圖中所述之看板娘人名純屬虛構、如有雷同、實屬巧合。)
回應 (0)
我要發表
