低智私房菜
2011/06/13 08:47:47
網誌分類:
生活
| 香港有個「非常」現象，就是傳媒大部份副刊都以「食」填補，電視台的綜合節目又好，報紙文化版都好，其實都是變相飲食節目，例如現在的《華麗明星賽》就是以食貴菜包裝，《街坊廚神》都是借飲食過橋介紹一下十八區，幸好還有點實質，即係Content。最難頂係無Budget、知少少扮代表發表飲食偉論的Show，頗低智。 我以前做過雜誌副刊，幫周刊開過一個叫「請客吃飯」的專欄，是第一代飲食版的反低智變奏，請一個名人找一個「不是圈中人」的朋友摸酒杯底談友情的，但現在的所謂乜乜飯局，卻變成隨便找個明星宣傳佢開間食店，再宣傳埋佢套戲，根本又係娛樂版般膚淺，日日報紙逼你看的飲食版面，內容實在濫得很，更不明白世界咁大，為甚麼除了跟飲食掛鈎以外，別無選擇。 我以前報紙編輯教落，做飲食版最緊要不是識食，而係幅相，一定要先影相，影完晒相，碟餸都凍啦，好心的廚師就整多碟畀你試食，但有啲記者試食都費事，寫句「賣相一流」，即係無試食過啦，但都有良心過嗰啲未食扮食咗大讚的記者！寫得稍有見地的，當堂聲價十倍，做了飲食節目主持人，仲做埋廣告代言人，像上一代的蔡瀾、李純恩，同輩的歐陽應齊等，大家都是文化人，寫文字邊有出息，轉寫飲食就大把人識，連我以前做過間電視台一位退休上司May姐也轉行賣曲奇，搖身一變成為傳媒御用的食評人，近來紅到發紫呢！ 更荒謬的是人人都可以在屋企開餐廳，想賺快錢，不妨打開你家門開樓上私房菜，夠膽就得，打個電話給傳媒報料熱線，即刻有記者上門做訪問，因為料荒，日日要掘料填補大量飲食版的空間，總之甚麼新食肆上場，飢不擇食，都會寫一餐，跟住食店門口貼滿剪報，你睇咗立即衝入去試，即刻衰咗，大呻搵笨。我也跟某本雜誌的介紹試個幾次，次次撞板，食店一經報道，門口大排長龍，坐地起價，那次去的是紅磡崇潔街的街坊小檔而已，燒六隻中蝦，明明雜誌寫係百二元，佢要收二百元，原來一經見報當日，坐地起價。 最近我又跟這本雜誌的指引去了彌敦道一間叫「我愛峇里島」的印尼私房菜，這間所謂「私房菜」，不過係人哋阿媽煮出來畀你食，一進門只是狹窄客廳一個，家具裝修完全無Taste可言，坐得極不舒服，本來食人哋阿媽煮的東西點都有HomeFeel，但碟巴東牛肉又硬又乾似骨頭，嗒晒啲汁舊肉完全吞唔落，竟因為叫「私房菜」，一碟牛肉餐收近二百元！咁唔掂，但點解雜誌可以寫到佢天上有地下無呢！開間餐廳有乜咁偉大，寫到真心英雄咁，開一間畫廊或書屋的人仲有心，但想找一個傳媒訪問都難，這就是典型的香港低智的文化現象了。 李志超 |
 | |
樓下,
須知經營飲食乃一門專業,絕非一朝一夕便能成事,本人敢問一句閣下及閣下之朋友有否從事過飲食業?
閣下聲言投資了十萬之巨,於飲食界而言可謂連買爐頭也未夠!再者貴店晚間看來也是住宅用途,日間拿來做生意,晚間一家大小拿來住,閣下之十萬大元真是化算得不得了。
本人嚐過貴店之所謂"印尼菜"後,真的不敢相信這樣的質素也能以"只擅菜肉"自居! 香港提供"印尼菜"的店我嚐過不少,你這家可以說是最不濟!
一個比人搵笨實的人上
李先生，
拜讀先生大作，方得知小店之巴東牛肉未能令先生滿意。小店當時未能即時察覺先生之不滿，小店深表歉意。如小店當時知道先生對小店食物不滿，按小店慣例，自當立刻免費回收該碟巴東牛肉。故小店願為先生退回六安士巴東牛肉連加壹金額共二百三十六元五角。煩請先生致電61208006安排退款。
小店得蒙媒體包涵，但從未以英雄自居。小店只是盡力希望為食客們提供一頓滿意的晚餐，亦賺取與工作對等之報酬，僅此而已。未敢與先生等藝術工作者比較。但亦斗膽請先生尊重一下吾等同業。雖同業中也有濫竽充數之輩，但小弟相信大部份皆屬有心人仕，並非先生口中所謂一心「搵快錢」之流。此終一家私房菜要開業起始投資不少。以小店為例，雖小店裝修被先生批評得一文不值，唯開業投資也達十萬之譜。加上初開業時門庭冷落，猶記得先生光臨小店時，全店只有先生與先生友人一檯。要取回投資真非三五七月不能做到，更遑論要「搵快錢」呢。
小店很認同先生有關報章雜誌食評質素參差的批評。小店亦試過因報章資料失實而被人罵過狗血淋頭。但小店亦曾有幸遇到很多食評家，他們對食物見識之淵博，對食評事業的專注，也教人肅然起敬、獲益良多。正如先生所言，食評雖非嚴謹文學，但當中實不乏佳作。如結集當年華僑日報出版之食經及唯靈先生寓掌故於食評的專欄皆是不可多得。所以相信食評處處並不一定是壞事。也許香港文藝風氣低落也未必與食評有關。
所謂食色性也、民以食為天，不然先生也不會讀食評而誤臨小店。萬望先生別為小事動氣，小店亦再次鄭重向先生賠個過不是。
山野小店只擅菜肉，不擅文字，班門弄斧，不知所云。望求見諒。
店主
Asya、Lydia,、Grace、Kelvin謹上