點解我冇開PUT?

大市真係有勢了, 不過係趺勢, 而且仲係好勁既跌勢, 琴日插4百, 今日朝早插過五百, 使唔使插咁多? 意大利都係唱下佢唔惦者, 唔同希臘有晒日子借唔到錢即刻違約喎, 淡水大戶果然有料到, 一早知道有今日, 配合評級機構大合唱, 月頭唔郁出手等你夾上, 上到咁上下見你唔再買上先至出手沽, 相信淡水大戶有大把"子彈"同消息係背後, 所以先咁淡定...計埋今日個市先趺得果兩日, 相信日子仲有排捱.......

講返正題, 自己確立左既博發達方法其實極度簡單, 就係"大升市大買LONG CALL", 聽落好廢, 不過其實真係WORK的, 07年大把人買CALL輛賺到開巷, 此辦法最大問題係冇人知幾時先係"升市", 通常"升市"開始時都冇人知, 到到人人都知時已經冇咩水位, 更慘既係開頭岩岩行左一段, 大家仲以為係上落市, 於是"都係等佢回下先買啦", 一等大市又升, 升升下到自己開始信既時候, 已經冇咩水位了, 此所以越"穩陣"既人, 越遲入市, 什至個市已經升完開始回返D先去入市, 咁就輸死人了

咁點樣可以捕捉到"升市", 又唔會怕買錯呢? 如果只係想捉到升市其實唔難, 只要不斷咁買就得, 好似我老豆咁, 次次大升市佢都有份贏錢的, 而且都贏唔少的, 原因係佢從來冇離開過市場, 鋪鋪買大, 個個月都揸重貨, 好似D人買馬咁, 期期都買大熱, 間唔中一場跑出, 佢咪贏錢囉, 所以一到大升市就成街股神, 呢鋪玩法其實唔係唔得, 關鍵係大升市出現既次數要夠密, 夠多, 可惜既係股市呢樣野好多時一年先炒得一轉, 有時可能兩年先大升一轉, 一轉得兩個零三個月, 個個月買大, 等佢開大......到佢開大果時真係唔知輸晒未

所以我呢個BLOG要個個交易日都寫, 日日第一段都要問自己"有勢未", 就係咁解........

不過咁都唔夠, 今日題目係..."點解冇買PUT?" 其實一早已經打算係23000水位PUT 隻330思捷, 我估呢隻股除非有大變, 否則可以一直PUT到佢被踢出恆指為止.......23000 PUT 330 唔係一個"大升市大買LONG CALL"既策略, 只係一個炒上落市食少少就走既策略, 但依家結果係PUT冇買到, 得個諗字, 大市趺左900點!!!!

呢個係一個好嚴重既過失, 賺少左唔係問題, 睇錯市先係問題, 冇買PUT係因為自己諗住 "大市應該可以彈到23000", 所以一直等23000, 其實等23000係白痴, 過得23000, 不如等23400或22900, 因為23000大位一破, 好少就停係果度, 通常大位唔係唔過就係超晒, 此其一

第二, 死等23000, 只有自己百份百命中, 真係去到23000先出手? 邊有咁準? 所以我發覺想捉轉角市, 唔應該自己諗定一個位死等, 應該有更好既策略

1/ 買轉角可以早少少買, 不過要嚴控注碼, 比如依家21900, 想買388CALL博反彈, 就咁睇趺得夠多, 不過睇勢只係趺得兩日, 仲好有可能有壞消息跟尾, 與其估388會唔會趺到$156, (依家$162.4), 死等$157.5先出手, 不如等趺到$160值博率開始夠時就小注出手, 原本想買3-5千, 可以只買一千OR五百先, 真係趺到$156先買埋果四千唔遲, 期權LONG好處係注碼可以極細, 一手二百蚊已經有交易, 另外, 博反彈越趺得夠多同夠耐, 值博率越高比如趺左十日同趺左兩日, 趺左十日值博得多 (前題係之前冇大升過, 好似依家咁, 07年牛三大升完既大趺可以多多都未趺夠), 所以第一注除非一買即中/彈, 否則唔好加碼, 更唔好隨便調轉去買PUT, 此為順勢買CALL唔中可反手買PUT同大趺一排買CALL博反彈唔好轉PUT既分別

2/ 另一個方法就係睇住個價, 通常跌開有條路, 如果突然間隻股唔再行"舊路", 比如連續3-5日冇再做出日中新低, 則有51%可能已經到底了, 可以根據賠訊買CALL博反彈, 呢招係我自創, 就咁睇圖都見到有例外, 如趺完升一兩日又再插過, 所以只能講有51%命中........不過配合賠率同市勢分析(趺左幾耐同幾多), 少注博下, 中就加碼應該都OK的....

點解我冇開PUT? 如果比我再嚟一次, 可能我22700先用一千大元PUT即月330, 琴日已經加碼, 今日再加.......SEE? 下次估頂估低唔好信自己, 要用方法同紀律去控制返自己, 依家既策略係等388到$160左右就極細注開CALL, 極細注加CALL直到$155, 一中就大注加碼.....睇下結果會點???