覬覦「不祥之水」聰聰掂者遭殃
2011/10/25 08:44:05
網誌分類:
生活
華懋善慈基金早期無錢打官司，曾搵過一些富豪義助，有個知情富豪爆料，話「哨牙聰」搞到今日咁，完全係佢自己一手做成，但小甜甜這一千億遺產可謂「不祥之水」，真係掂嗰個死嗰個。
首先係華懋老闆王德輝當年因為有水，被人綁票兩次，最後被綁匪撕票浮屍碧海。到王德輝老婆小甜甜接收遺產，又吸引了老爺王廷歆打官司爭產，結果小甜甜一度涉嫌偽造遺囑被警方拘捕作刑事調查，雖然佢最後打贏爭產官司，但唔知係唔係壓力太大，小甜甜六十多歲英年早逝，又死一件。到「哨牙聰」出來爭產，最後花了巨資都輸埋，仲要面對重重官非。知情富豪問︰「你話呢筆水係唔係不祥之水？」
有人曾發信尋和解
佢仲爆料話早期打官司時，有人曾發過信畀「哨牙聰」話願意和解，可以分三成遺產畀「哨牙聰」。雖然呢一招好可能係緩兵之計，但如果「哨牙聰」接受，隨時就此停戰。不過「哨牙聰」當日好大想頭，想食晒成份身家，不肯接受，否則今日揸住三成身家都有二百、三百億，可以歎世界，仲唔使因為遺囑爭議俾差人拉，亦唔使自爆收過小甜甜二十億俾稅局追稅，所以佢迷頭迷腦打官司，真係得三個字︰「攞嚟衰」，亦反映筆錢真係幾邪吓。
KellyChu
回應
(0)
我要發表