減肥大作戰の九
2007/08/02 22:14:26 網誌分類: 生活
一放工，拿拿聲一拐一拐地離開，再轉的士，終於趕到跌打館。被阿姐寸一輪，又被師傅寸一輪，臨尾又被阿姐寸多一輪，唉……誰叫我阻住人家收工……冇錯，劉德華話：「今時今日，咁既服務態度係唔夠架」，但這間跌打館的確是我家附近最出名又最有料的跌打館，佢再寸都吹佢唔脹……唉……
筋膜炎！
今次大鑊。一年前左右吧，我扭傷了膝蓋，也是筋膜炎。回想當日情景，猶有餘悸……
．每日換藥，次次百幾蚊，你唔好去搶！
．敷藥位置不能濕水，洗澡時要用膠袋加膠紙加毛巾封到實一實，就晒角度咁洗。
．戒口，勁戒口，嘩，陰公到呢，你知我架啦，真係好為食架嘛，OK，戒口當減肥咯，衰在佢連我減肥時食既野都要戒埋！我減肥時食魚蛋米走油，你就話「魚蛋用無鱗魚做，唔食得」；我食雲吞米走油，你就話「雲吞有蝦唔食得」；粟米雲吞得卦？「唔好意思，個湯底唔得！」頂，你擺明玩我啦！食乜好呀？「係屋企食咯」你估家陣係八十年代呀？屋企飯……
．「八點鐘收鋪，唔好再遲喇下，下次再遲我唔等你我地收鋪架喇。」我心諗，喂，我今日都係遲左唔夠10分鐘唧，我已經趕住黎架啦，咁我番工番得遠你估我想架？番工之前黎睇得唔得先？「我地九點鐘開門，仲有，我地師傅九點幾先番到黎」，乜野番到黎呀？你地明明前鋪後居架喎！
去年的回憶，歷歷在目。一年之後的今晚，同樣的對白，又再度出現在荃灣一家小小的、但好著名的跌打館中……一條幾PK的夆子，被一條更PK的阿姐寸到一棟都冇……
p.s.多謝老婆陪我
（靜靜雞話你知：是老婆叫我加這句的）
好正！相信講到咁，連擁有三十幾寸不爛之舌的Sunday哥哥都無話可說了～遼大好o野！真有梁實秋「罵人的藝術」之風範！
Sunday哥哥，投降吧！就算你最輕，運動神經也是2級（據考評局新標準）而已～
來恩，我唔准你咁話肥sun架下，雖然佢冇拖拍，冇女媾，分分鐘可能仲係青……但點都唔可以咁話佢架嘛，咁好hurt人架，佢只能夠對住D平面野，墮入二次元空間妄想症既世界，唔似得我地呢d正常男人咁屬於三維3D凹凸既世界，但佢都唔想架，奈何佢又肥又……哎呀，都係唔可以咁講，咁樣講真係好唔要得，阿媽教落千祈咪落井下石，不孝有三無後為大，佢都好努力架喇，好盡心盡力咁照顧細佬妹，呢D咪就係一個好人咯，只可惜D女仔只會話「你係一個好人，但係……」，傳說中的「好人卡」，oh！……拿，真係唔好寸佢呢味野，佢會嬲架，雖然佢都慣左……
遼大，
下次做運動前必須先熱身，
可減少受傷的機會，
尤其是我們這些平時少運動之人（筋骨繃緊），
必須讓身體熱熱身
，
讓「他」跟得上「減肥之魂」
，
做運動才可更有效，不會出現反效果～
你要明白，我就算瘦到見到棚骨，磅數上都會幾重，因為骨重 & 腿粗。腿粗呢家野我真係唔知點搞，我細細個全身都好瘦，但條腿都好粗。骨重更加唔使講，我唔係關羽，唔能夠去搵華佗幫我削骨。
所以當我150的時候，我真係會好瘦下。查實，就算而家我呢個磅數，論腰圍都唔係你想象中咁誇張。
你個死人頭阿sun，咁毒你都講得出口！我距離你講果個數字仲有好遠好遠好遠的差距！
昨晚我上磅時，只有17X磅，比一個月前輕了10磅！（雖然跟賭賽的目標還欠3磅……）只要我的腳一好了，就會立刻再跑步。以這速度計算，不消幾個月，我就可以重回15X磅的level（呀，唸大學時的數字呀～～）到時我約你出黎游水，你咪托手肘，等住畀我寸啦！
不，她好乖，好乖地幫我吸地，本來該是我做的。
雖然我有一隻痛腳，但不在任何人手中 :)