《爛劍》大結局
2007/08/04 11:57:18 網誌分類: 影視
尋晚《爛劍》大結局,剛巧那時我去完跌打館番到企睇到,嘩,嚇得我丫~
有冇咁爛呀???
雖然,一早就人同我講,話佢上網BT晒落黎睇左,個結局爛到無倫,爛到九彩,晨早有晒心理準備,但都唔係爛到咁嘛?
唔通,呢個係無記編劇既策略?「係呀,我地好冇料到架,剩係識抄人,仲要抄得屎波。要我地諗正經故仔,殺左我地好過,你睇下《衰弱瘋丸》雷聲大雨點小就知啦。咁冇野既,做唔到正野,咪做爛野咯,adam井都係靠咁樣跑出之嘛。冇錯!爛,都係一個賣點,我地全台編劇上上下下,一齊玩『爛』,今次掂呀!」
於是,就有了一齣《爛劍》……明抄《瘋暈》都算啦,仲要玩埋一陽指、葵花寶典、如來神掌、彈指神通,連鳥山明既龜波氣功都出埋?有冇過分少少呀?編劇以為咁樣好好笑,但我真係唔識笑,連恥笑都笑唔出,只係多左個barcode頭。
爛到咁,你唔好去死?!
呢D唔係叫惡搞,唔似得《殭屍》系列玩得咁正咁盡咁high,搞清楚,你地唔係陳13呀!
將現代口頭禪放落古裝度, 唔係唔得, 但有高低手之分; 好似之前深夜播果套秀才遇著兵, ok丫, 玩得幾好睇。
要無記拍番「正正路路」的古裝片, 很難了; 綜觀全台, 有一個半個蕭笙嗎? 冇! 更何況, 就算蕭笙翻生去到無記, 可能都無用武之地。