不想搵工的新一代

「依家D後生仔，究竟是甚麼心態？」

朋友滿腹牢騷，皆因他剛才食晏時，聽到隔離檯的一段母子對話，聽後覺得非常氣憤，一時看不過眼，故在網上傳訊，叫其他人齊來評一評理。

這段母子對話是這樣的。

母：好心你搵份正經野做啦！

子：咁辛苦，D同學都係搵得一萬蚊，你做啦！

母：我做左咁多年，都係得一萬蚊喎！

子：咁咪係囉！文盲又係搵一萬，我地大學生又係搵一萬，你做埋我果份！

母：咁我死左，邊個養你，你就等餓死！

子：超！你死左，我先至發達喎！你層樓自然歸我，仲有你果幾十萬人壽保

        險，加加埋埋，都可以夠我慢慢使！

母：你個衰仔，得果幾十萬，我睇你用得幾耐？ 

子：我會申請公屋，用哂果幾十萬，就賣左層樓，到時咪有幾百萬囉！

        你成世搵埋搵埋唔用，咪又係得果幾百萬！我成世唔駛做，都有幾百萬喎！

母：你冇用架你！

子：我係大學生黎架！冇用？大學生食腦架嘛！依家呢個年代，個個同學都係

        咁諗架啦！只不過冇乜邊個，好似我咁坦白，老老實實咁同老豆老母講！

        我都費事同你講啦，有代溝！

母：聽你咁講，好似重覺得自己的諗法好啱？

子：時代唔同，如果我地D輩，大部份人都係咁諗，都覺得好啱既時候，就係事

        實；唔同睇法既人，只係食古不化，自然係錯啦！要怪，就怪個社會啦！

母：………………

依家D年青人，畢業以後，為甚麼情願日日游手好閒，卻冇想過要搵份工做？佢地天天想著換甚麼手機，整日無無聊聊，唔係喺屋企上網打機，就係行街睇戲，使阿爸阿媽既錢，冇慚愧之心，還理直氣壯，完全唔知搵錢艱難！

即使佢地搵到野做，三日唔埋，少少受氣，就炒老闆魷魚，遲到早退，又諸多要求，又怕辛苦，鍾意做乜就做乜，完全冇D責任感！

千錯萬錯，又係社會的錯；究竟是最低工資惹的禍，還是社會福利太好，種出來的惡果？是父母的過度溺愛縱容，還是教育政策的失敗？

當大學生也情願坐係屋企攞綜援，伸大手板等救濟，大食懶等上公屋，不肯自食其力時，我們的下一代，真的沒希望了！