相見歡

大婆亞虎一句唔該，送上休書，眾姊姊們大部份原本對應用電腦都係有限公司，忽然間如有神助，真係話都冇咁快，全部響三日內走晒過嚟開新blog----所以話：老娘發威，真係唔可以少睇！

依家熟果啲網友都重新響度搵番晒，又可以繼續吹水----即使大家可以約埋飲茶再續未了緣，但係網上吹水不受時間、空間阻隔，呢啲係冇嘢可以代替嘅！

尋日做咩行祟光？買我嘅老人三寶之一----血壓計囉！暫時我祇知呢一樣咋，遲啲可能要加條披肩咯，因為最近呢兩次北上操曲，去到傍晚都唔知何解，凍到心同腳都震晒(果個時間真係饑寒交迫呀)！

同一個牌子有四五款，最貴嘅一千四百幾，最平嘅六百左右；我買呢部九百幾，同其他幾款(唔計最貴果款)比較，佢嘅臂帶唔會好似其他款咁一路漲，谷到隻手好唔舒服；要舒服就要付出代價，所以咪貴啲囉！而且佢仲可以量埋心率。不過手臂太肥大者免問，因為佢得一個碼，俾錢都配唔倒大碼-----原來除左健康之外，仲有錢解決唔倒嘅問題！