義工服務

差不多成年冇去老人院唱歌，老人院位社工問左我好多次，終於擇定左尋日。

因為係閒日，朋友多數唔得閒，得閒果啲多數係子喉，冇咩幫助。因此，我決定除左唱歌之外，搵我位御用攝影師幫啲老人家影大頭相。社工告知，佢果度啲職員個個都係唱家班(難道係入職條件之一)，祇係唔識唱粵曲啫！咁就簡單啦，我一個人唱獨腳戲，剩番嘅時間咪佢地攪掂囉！

根據過往經驗，每次逗留時間祇係得個半小時。社工叫我位朋友一點去放好攝影器材，兩點開始；照計三時多便可以完成，因此我約左附近位牙醫四點補牙(講得大話多，崩左少少大牙；醫生話唔補都冇問題，不過，明知有問題嘅，梗係整好佢啦)。誰知我地一點去到立刻開始做，淨係影果四十幾人都攪左兩個幾鐘頭，完左距離四點得番45分鐘左右(仲要預5分鐘行過去牙醫度)，於是我選唱左「昭君出塞」、「紅燭淚」同「一代天嬌」。

唱呢幾首歌除左係因為獨唱曲之中，老人家熟識嘅曲唔多；雖然我都預埋「殘夜泣箋」，不過除左時間之外，呢首歌佢地應該唔太認識！

過往我響工作嘅時候，好多時要回信俾市民，我對同事嘅要求係：你寫一封信俾人，要從收信人嘅立場去睇封信，否則信嘅內容你明、對方唔明係冇用嘅----咁即係對牛彈琴啫！

點解講舊時？因為揀歌一樣---你要唱俾老人家聽嘅，就要投其所好，唔係揀你最新學左咩嘢歌、係佢地喜歡聽咩嘢歌！當我唱「紅燭淚」嘅時候，我同佢地講：呢首歌嘅名你地可能唔認識，但係首歌嘅旋律你地一定識！

果然，唱左兩個字，佢地經以拍晒手掌---唔係我唱得好，係佢地太熟呢首歌！

依家啲人出「騷」，一樣係鬥揀新歌嚟唱；唔係話新歌唔好(十首中都有一首聽得吓嘅，最主要係好嘅撰曲人真係賣少見少！最近聽首新歌「啼笑金玉緣」，首歌寫到差到極)，不過都要睇吓你嘅對象係咩嘢人，如果觀眾大部份係學緊粵曲嘅，可能問題唔大，否則....

曲友芳芳早兩日同我講：「九月初去屯門大會堂聽演唱會捧朋友場，七首歌中有六首新歌，我學左廿年粵曲都唔識呢啲歌，悶到想死！」

又撐到咁遠？講番尋日，每次去呢間老人院我都會預備啲禮物送俾院友。今次諗住既然同佢地影相，不如送相部啦！相部都係我位攝影師老友贊助嘅：

一本四R相部，每本可放廿四張相，朋友覺得院友用得著(佢會將院友嘅相執好後、晒番彩色同黑白相俾佢地兼存放埋響影碟度送俾佢地嘅子女)！呢啲相簿佢每次俾我、都俾我鬧----呢啲相簿放得咁少相嘥掟方呀，所以佢依家俾啲放得二百張相嘅相簿俾我(真黑人憎，唔駛你俾錢仲要嫌三嫌四！)