衝上雲霄二

呢套劇上星期日播完，果晚所有台都冇嘢睇，我追開啲歷史劇又啱啱睇完，想唔睇都唔得！

對於呢套劇，我由有期望、變到冇期望、到後來係失望！相對起我上網睇內地拍果啲劇，真係不可同日而語。如果有追開高清台11:55分套「步步驚心」嘅，最近做完播由林峰、葉璇做果套「紫釵奇緣」，就高低立見啦！睇完香港拍呢套咁嘅劇，真係連霍小玉都醜化埋，一個二個啲演技浮誇到死。

「衝」呢套劇除左啲人物感情生活亂過亂世佳人之外，亦欠缺說服力！馬國明同江美儀嘅感情睇唔出建基響邊度(我唔係因為佢地年齡嘅差距，你估我唔驚俾人話我年齡岐視呀)，單立文最終讓愛亦係無厘頭！謙謙同胡定欣一樣係女大男小，但係佢地相愛都仲有啲前因吖，雖然我絕對唔認同好朋友可以好到一位未嫁姑娘代朋友生仔；成套戲我最討厭果個Triangel 公仔，搵嘢嚟講；由頭睇到尾、再由尾睇番上頭都唔接受Caption Tong同Holliday最終成為一對！雖然兩公婆唔一定要太相似、但係佢地兩個真係南轅北轍，冇邊忽夾得嚟，反而Holliday同 Cool魔夾好多---都係用情不專、亂咁嚟嘅人！Caption Tong娶左Holliday，第日真係要好似湊女咁湊！如果套劇仲有下集，應該係講佢地離婚收場，Holliday嫁番俾Cool魔。

接住播果套，暫時都好似唔太差嘅，除左周海媚之外！

呢套劇係今年收視最高嘅劇集----唔係佢好，祇係之前果啲太差啫！再係咁攪落去，日後上網搵片睇好過咯！