朋友？

相識滿天下，知己有幾人？

人生得一知己，死而無憾，可知道相識容易、相知難！

睇吓「笑傲江湖」，正邪兩個人因音律而相知相交、卻因正邪不能兩立，寧一死！

依家呢個世界，你有你嘅生活、我有我嘅忙碌，好朋友分分鐘幾個月都唔見一次面！但係祇要你有事，佢地會第一時間(即使要告假)伸出援手----呢啲咪叫做好朋友囉！不過，你一樣要做到咁，唔可以單向架。

好朋友唔需要成日見住，好似我退左休啫，好多朋友都未退休架，我依家係御用閒人，人地周身唔得閒，點可能成日陪住你？

我對朋友有要求架----貴精不貴多！分得好清架：同學係一齊上過課(學咩嘢都好啦)、曲友係一齊學唱歌嘅、相識係大家知道對方係咩水、同事係一齊工作過嘅...

以上所講嘅都未算係朋友，但係佢地個個都有可能日後成為我嘅朋友！好簡單啫，同學同上粵曲班嘅曲友都係冇得揀嘅(同親人一樣啦，好唔好都要接受)，你上課就識得，不過有啲人下左課之後，同佢講多句你都唔想，咁點可能變成朋友？

同事一樣啦！響政府做事嘅同事，佢地調到嚟你嘅工作地點，無論你喜唔喜歡，都要同佢做同事架啦！出左嚟私人機構比較好啲，因為大部份同事見工我都有份見，好壞都有個譜！但係大家冇共事之後仲有交往嘅先至係踏出成為朋友嘅第一步！

有啲人，得閒會約你飲茶吹水，但係目的唔係想見吓你、問候吓你，而係想從你把口探聽另外一啲朋友嘅消息(最好仲佢係人地啲淤嘢)，要來何用？你唔知呢個世界好多人鍾意搵是非做人情嘅咩？呢啲人(唔係朋友)我都會間唔中應酬吓，不過絕對唔會輕易俾佢從我把口攞倒料。

我地依家識得嘅大部份都係上左年紀、空閒時間太多嘅朋友，原本係好事---得閒大家聚吓、傾吓計，係曲友嘅仲好啦，淨係哭吓歌喪都可以吹足幾小時水，互數/訴唱邊首歌有邊句有問題，有咩嘢可以改進。

好似我同芳芳唱完首「映紅霞」，我同佢講：「你開頭唱果段二流，我覺得應該俾人覺得你係好開心至啱喎(佢經已唱啱左咯，要求又要再高啲架啦)！雖然成首係悲歌，但係開頭唱段二流嘅時候，梁山伯都未知祝英台許配左馬文才，當時一心去祝家莊下聘架馬。」芳芳聽完我咁講，佢都好認同，約定下次改過個唱法。

又有一次，操完曲食晚飯，我講先：「哈哈！正話我地算唔算係唱到一仆一碌呢？」

答：「係呀！音樂師父又唔熟、我地又唔熟，非戰之罪！一於下次去同一間曲社操過，希望下次唱好啲！」我地就係咁樣相處。

但係，唔知係咪唱粵曲嘅人心胸特別窄嘅呢？(死啦！得罪好多人添)

好多人都認為自己唱曲好到天下無敵、甚至好過好多大老倌添！所以，好多時你同佢傾唱曲嘅時候，原本諗住互相切磋嘅，結果可能俾對方數到你體無完膚----講到差不多呢個世上除左佢，冇個得！我地唔係專業唱家，唱歌冇可能冇瑕疵(專業唱家好多時都唱錯啦)，我嘅要求係唱同一首歌，一次要比一次好啫！偏偏批評人果位仁兄仁姊自己都唔係唱得好，祇不過因為大家免免強強都算係朋友、免得過亦唔想講得太直接，盡可能忍惡揚善啫！

對住呢啲咁嘅人，你激氣都多餘----因為佢唱成點有目共睹，係佢冇自知之明啫！

如果係我，一早將佢從我朋友嘅名單度刪除左啦，駛咩因呢啲人而激親自己！