羅蘭認命不信運

她很紅，卻很窮。

羅蘭笑著說，自己的財運差到不得了，幾乎買乜都輸！TVB台慶時，薛家燕、黎耀祥都中過大獎，但羅蘭在無綫三十幾年，連一次細獎都未中過。

羅蘭家住旺角太子道，那一輩的明星，方便返電視台、去片場，特別鍾情九龍西，如何文田、太子，咁多年買樓換樓都係住這一區，最初買樓，都是媽媽話事。其母94年離世，她也再沒搬過家了。

九十年代爆發移民潮，羅蘭跟大隊入紙移民加拿大，並獲得批准，「我哋兩母女，經歷過打日本仔的時期，好擔心又要打仗。阿媽當年帶住我離開大陸，但到九七後，我六十幾歲，仲點帶住九十幾歲的阿媽走難？於是我打算想移民。」

未幾，母親健康急轉直下，最終沒等到回歸，94年離世，「阿媽走咗，我得番一個人，就無需要再移民了。」那時眼看樓市起起落落，她倒有點懊悔，沒有多買一層樓，「我在投資上總是冇運、冇眼光，七十年代股災，我輸咗好多好多錢，我當時唔識買股票，都係聽人講。到香港回歸前，我放棄移民，其實可以買吓樓，偏偏我又冇買。」

她偏好投資基金股票，但08年雷曼爆煲，拖累羅蘭姐的老本都蝕埋，「我冇買雷曼，只是買了歐洲基金，仲有股票，但都受拖累跌晒價，家下惟有放埋一邊。其實自己本錢有限，都係想收吓息，點知都咁困難。」

不過，篤信天主的羅蘭，認為一切自有安排，姻緣如是，財富亦如是，有時天降橫財，亦可能無福消受，「電視台有個道具部的員工，有次中咗幾百萬，自此以後，個心成日跳，有錢係咪一定好，都未必㗎。」

她說自己工資不高，好在多工開，尤其是以前拍戲，行頭根本好少人。只可惜不善投資，故財富累積成果平平，不過，錢唔多，夠用就得，壞咗個電視，我買得起，朋友組隊去旅行，我亦畀得到，咁就足夠啦。

羅蘭姐芳齡七十有八，還有一年多就可以擺八十大壽，「我唔同胡楓，他有兒有女有孫抱，我冇。阿媽九十歲生日，都唔肯擺酒，阿媽唔擺，我有乜理由要擺？」11月的生日，教會朋友給她弄了個大蛋糕，就當慶祝了，貫徹她簡樸的生活態度。

在她腦海，已經沒有要找個強壯臂彎來倚靠的念頭，「唓，你點知個男人會一世照顧你？可能激到你紮紮跳，仲衰過自己一個人。」她說長年在戲中演壞女人，深入民心，確實成為良緣的絆腳石，畢竟在舊時代，觀眾真的會以為你就是這類壞人，「我後生時，有個朋友想介紹個男仔畀我，點知佢話自己的錢，不夠我入電油！」

十多段姻緣，全部無疾而終，連談婚論嫁的地步都未到過，「真係整定㗎！」不過有男人恐懼症的她，堅稱冇所謂，「搵另一半唔容易，男人呢，廿幾歲鍾意廿幾歲女仔，到咗八十歲，都係鍾意廿幾歲的女仔……」

已經獨居多年的羅蘭說，最緊要保持廣闊的朋友圈子，就不會感到寂寞，「我在電影圈、電視台、教會都各有一班好朋友，唔拍戲都好忙。做人一定要開放些，不要等朋友來約，自己不妨主動去約人，所以能否過快樂的獨身生活，好視乎性格。」

羅蘭原名盧燕英，16歲入行，專做反派、二線角色，但越老，反而越受觀眾歡迎，2000年電影《爆裂刑警》，憑四婆一角，連奪香港電影金像獎、香港電影評論學會最佳女主角、及金紫荊獎最佳女配角，成為最年長的影后，「龍婆」與「聖羅蘭」，更是連九十後都唔會話out，狐狸精已經修成正果。

07年因感年事已高，記憶力大不如前，實行半退休，做義工、去旅遊，但她說真有戲癮這回事，「睇添哥和祥仔的劇，睇到我心思思。」一年前重返TVB，成為最搶手的甘草演員。

屹立娛圈逾半個世紀，豈會無因？羅蘭姐示範了為人處世之道，就是牙齒當金使。譬如說，答應記者擠出時間來做訪問，以為只是得閒飲杯茶的隨口噏，但原來羅蘭真會切實地記住，抽到空檔，就主動來電，實踐諾言。

羅蘭姐還深諳日行一善的道理，對著攝影哥哥說：「你咁靚仔，應該去做明星。」逗得哥哥仔笑得見牙唔見眼，拍照時份外落力，不花分文，就取得高回報投資。