來也匆匆、去也匆匆

上個月唯一一個大佬由美國返港，頭尾三星期，實際得十日左右，因為有一個星期去左星加坡！

今次返港，主要係探吓住響老人院嘅阿媽。佢第一次去，覺得間老人院幾光猛同乾淨企理(佢外母未過身前也住在美國的老人院，一入去便有些難聞的氣味)。佢地響美國出入都要坐車，阿嫂行兩條街都唔掂，所以活動祇焗限於吃喝，要行嘅便得我阿哥同姪女做----即使去到星加坡嘅室內有冷氣公園，據聞阿嫂一入去影張相便搵個位坐，等佢地行完搵番佢！姪女嘅嘆：嘥入場劵！

上星期同佢地去黃埔間「陶源」晚飯，呢間食肆響呢區算係高檔架啦！服務唔錯，不過食物質素祇係一般！

左上角果碟「燒肉」得九小粒，真係好小同好少架！如果好食嘅，都冇所謂啦，但係相對其他食肆同類食品，是失敗之作！同佢放埋一齊果碟「海蜇鴨舌」，實物同張相真係好大距離，而且味道亦好一般！

上面中間果碟係「杏汁豬肺湯」，相比百樂潮州酒樓果啲又差一皮。百樂果啲我相信係加左奶嘅、同時啲杏仁磨碎嚟用，所以啲湯奶白色；呢度落左雞腳，杏仁成粒用，所以啲湯係清嘅，鍾意邊種，見人見智啦！

上面最右手果碟係「老媽手啄肉餅」，同出面做嘅肉餅最大分別係佢比較散，啲肉同咸魚都係用手切成小粒，食落比較有好感，亦唔覺得咸。

中間條係「清蒸沙巴龍躉」，$688一條，呢條魚算係滿意嘅一味。

下面左手面果碗係白飯。姪女問：飯都影？

我：因為好少有白飯加左幾粒粟米囉！而且啲飯係蒸出嚟嘅，不過我覺得口感太硬！

下面中間果碟係「欖菜蒸茄子」，原本以為呢味最清，但係咁多碟最咸呢碟，賣相又唔得，啲茄子黑麻麻，最後要配給監人食晒佢！

食完飯，意猶未盡，行去同區嘅「芝麻綠豆」食甜品！唔係真係覺得佢啲甜品好食，祇不覺佢名氣大兼且我大佬未食過咋！