又食！

原諒吓啦，大佬聽晚走啦，都係食埋呢兩日啫！

尋晚表妹請食飯，席設銅鑼灣廣場「泉章居」，除左呢間，仲有一間響旺角染布房街。

呢間食肆我久聞其名，不過未食過！尋晚第一次食，表妹係熟客，老板親自招呼。九男女(唉！我永遠都逃唔過呢個數字嘅宿命----原本係九個人，結果其中一個因事唔嚟得，心中慶幸剩番八個；誰知另一個小朋友帶埋女朋友嚟，點都要砌夠「狗男女」至開心)，食物叫得太多啦，加埋自來嘅兩枝紅酒、兩枝白酒；食完仲意猶未盡，打「的」去酒廊聽歌！

依家出去中式酒樓食飯，例牌推介叫你order冬瓜盅。其實我最唔鍾意飲「冬瓜盅」，除左飲到成肚水之外，啲湯淡茂茂，一啲都唔好飲！上星期響怡東酒店「怡東軒」飲倒果盅例外----可能有蝦掛，啲味清得嚟有鮮味。

尋晚呢個「冬瓜盅」又係淡茂茂，夜香花？冇播；金華火腿？都冇播！咩呢啲唔係「冬瓜盅」嘅精髓嚟咩？

左上角果味係「客家拼盆」：四樣嘢---炸大腸、炸鮮奶、海蜇、燻蹄。最鍾意係佢嘅裝飾----一棵樹！樹幹係一大舊去左皮嘅薑，再用甘筍同蘭花做成唔同姿勢嘅雀仔。創意幾好，不過我地一致認為甘筍似魚多啲、反而蘭花嘅做形似雀仔多啲！

喂！依家講緊食嘢呀，咪離題先得架。海蜇、燻蹄同炸大腸都ok，炸鮮奶則咸左少少，理論上「炸鮮奶」應該係甜甜地至啱嘅。

佢隔離碟「梅菜扣肉」係客家名菜，但係豬肉瘦嘅部份始終做得「鞋」，我咁鍾意食扣肉嘅人都祇係覺得麻麻地好食。

頭盆係中間左手面果碟「蒜茸青瓜」同「沙薑雞腳」(唔記得影)。青瓜都合格、但係雞腳唔得--雞腳未夠稔而且冇味，要醮沙薑汁先食得！我個人覺得沙薑雞腳本身應該有味，沙薑汁另上係因應個人口味，可以點或唔點嚟食！

最中間條蒸海斑(食到不似魚形先醒起未影相)算係最好嘅一味。

佢右手面係「客家鹽焗雞」，屬招牌菜。唔好意思，唔講真係唔知佢係鹽焗雞---因為冇咩咸味！而且佢上檯嘅時候大家都飽晒，祇係食左幾舊，差唔多成碟響番度。

下面三味分別是：上湯菜心、紅燒豆腐同京都骨。「京都骨」啲味調較得最好；上湯菜心冇咩功夫可言、紅燒豆腐都唔錯！

糖水「雪耳木瓜」同「紅豆沙湯圓」係送嘅！前者我冇食、後者啲湯圓未夠熱。

究竟係自己越嚟越挑剔、抑或依家食肆啲質素越嚟越差呢？