送禮

以前打工，遇著老板因工事要做人情，我都要幫佢諗吓買咩嘢？因為係出公數，政府有規定最高嘅上限，一般都係幾百蚊，要諗啲大體又見得人嘅嘢都好有難度！(冇咩嘢幾多個可以好似「貪湯」咁次次買幾千蚊嘢、仲要送俾同一個人)

退左休，慶幸唔駛再為送禮而操心。

上星期某舊老板升級請食飯，我見其他幾個人都好似冇聲冇氣咁，於是問眾人：「阿？請食飯，我地係咪應該有啲表示？」

有人建議：「不如送袖口鈕！」

我：「吓！咩依家仲有人用袖口鈕？要送，不如買領呔啦----如果一個女人送就驚人地太太疑心啫；你地幾個加埋我呢個老女人、就唔駛擔心啦！」

最終決定由其中一位負責買。

食飯果日，負責人話領呔好難揀，結果買左墨水筆。

我：「吓！依家好少人用墨水筆喎。」

以前好多老板鍾意用墨水筆簽名，包括我啲舊老板！但係自從某一年，我預備左幾千張賀年咭俾其中一位簽----因為墨水難乾、加埋賀年咭嘅紙質更難乾！結果啲簽名花晒，從此佢都唔再用墨水筆！

當枝筆送到舊老板手上，(佢面有難色)答：「冇問題、冇問題，枝筆好靚！」

你估佢會唔會用呢？

所以，依家好怕要諗買禮物送俾人。姪新抱送俾我果個Kipling袋，雖然係我用開嘅牌子，但係個size好細，我姪女知我一向用開大袋，禁不住都問：「你用唔用得著？」

我答：「無所謂啦！幾時我要扮淑女----淨係帶八達通、電話、tissue同鎖匙出街果日咪用得著囉！」(你唔見啲名媛著住對幾吋高嘅鞋、拎住個淨係可以放倒枝唇膏同tissue嘅手袋仔咩？人地唔駛帶錢出街、有阿四幫佢拎嘢、屋企有工人開門....)

所以，我大佬返美國，我都係封利是俾各人----最怕買左啲人地唔啱用、又過唔倒關、又放唔入匣嘅嘢！