健康

上星期舊老細請食飯，其實佢約我地呢六個人差唔多全部各散東西----我七年前轉左職依家退埋休、另一位舊同事最近亦退左休、一位八年前辭職移民，帶個仔去加記讀書，啱啱陪仔讀完書返港、一位幾年前出左去福利機構做事、一位仲響政府、得番一位仲留響舊寫字樓。

上次相聚，我同果位出左去福利機構做事嘅舊同事講：「我遲啲要搵你幫手約個期睇中醫。」(佢在對上一次聚會時同我地講：有咩幫手搵佢。當時我問佢：「你有咩嘢幫倒手？」

佢答：「介紹好醫生俾你囉！」)

早輪腰痛睇中醫食左兩個月藥，食到唔想再食！停左藥之後，始終係覺得未好番，於是諗住換吓醫生，聽多個意見。

我記得呢位同事講過，佢通常返下午，但係尋日成個下午都搵佢唔倒！雖然我有佢手機號碼，但見一來唔急、二來如果佢開緊會就無謂騷擾人啦！

今朝食緊早餐，諗住即管再試吓搵佢(其實打左輸數)，竟然搵倒！佢話因為家人有事，所以最近下午冇上班，改左返上午。

我問：「係咪就係你上次講果樣嘢？」佢上次一味叫我地最緊要照胃、照腸，原來係講緊佢阿哥，腸癌經已擴散到肺部。

我叫佢凡事諗開啲啦，因為我經歷太多啦！跟住同佢講我阿媽廿幾年前患癌、仲係幾後期添，依家仲生吽吽響老人院，成間院頭腦最靈活果個係佢呀！不過，我阿哥1996年血癌，一年唔夠就去左咯，所以越年輕、越難攪！祇能夠望佢可以舒服啲。

不過，都係果句：生死有命，如果咩嘢跡象都冇嘅，點都唔會做呢啲咁嘅檢查！