打死都唔好嫁的男人

1. 有嚴重自戀傾向的男人

經常有意無意地「哂命」，哂人工、哂才華、哂物質，自命條件極佳，暗示佢「睇得上你」，係你行運。呢種男人只會活在自己的世界裡，難以真誠地與人溝通，心裡面只有他自己是最好的，其他人都不算甚麼，包括你在內。

2. 曾經出軌的男人

一次不忠，百次不用，習慣花天酒地的男人，在他的眼裡「女人如衣服」，而換衫就如同心癮一樣，唔好奢求他會放棄這種嗜好。

3. 冇膊頭沒腰骨的男人

自己做的事要敢於承擔，一有事就推卸責任，走都走唔切，要身邊的人幫手擋駕的男人，不但卑鄙而且可恥，嫁得佢就預左蘇州屎，有排你掃，真係執到都要喊三聲。

4. 講大話不眨眼的男人

同說話無句真的男人相處得耐，會變得疑心超重，因為完全估唔到佢，幾時真幾時假，結果只會被耍到陀陀擰，註定要蝕底。

5. 戀愛經驗過多的男人

身邊永遠要有幾個「深愛我的紅顏知己」，對象換完一個又一個，都覺得唔理想，即使已有伴侶，仍然想搵個更好，鐘意周圍撩女仔，玩曖昧，永遠在尋找「真愛」，其實最愛的只有佢自己。

6. 與父母關係欠佳的男人

一個人與父母家人的相處模式，或多或少就係佢處理婚姻關係的潛意識。如果佢同父母溝通不良，或到處結怨，當你同佢成為家人時，亦唔見得可以好好相處。

7. 一貧如洗的男人

愛情係重要，但都要建基於麵包之上。所謂貧賤夫妻百事哀，如果一個男人三餐不保，個個月連奶粉錢都成問題，甚至負債纍纍，你跟著佢只會得個捱字。所以女人千萬不能感情用事，嫁給窮光蛋，除非自己好有錢。

8. 斤斤計較的男人

窮都唔係最可怕，最難頂係他對任何事都斤斤計較。已經唔係學生哥，但所有洗費都要AA制，連零頭都唔放過。呢種吝嗇小氣的男人，心胸一定狹窄，而且小心眼，嫁得畀佢，肯定唔餓死都激死。

9. 吃軟飯的男人

不求上進的男人，如同寄生蟲，一心只想靠女人來養，對女人更不可能有真心可言。如果佢厚面皮到，開口問你借錢，甚至要零用錢，就真係早飛早著。

10. 任何事都彈三彈四的男人

佢對任何事都睇唔順眼，不斷數落身邊朋友，甚至貶低歷任女友，即使佢「勉為其難」揀左你，都會繼續樣樣嫌三嫌四，婚後肯定有排你受！

11. 經常粗口爛舌的男人

動不動就用三字經問候人的男人，一般都脾氣暴燥，非常容易動怒，婚後一定會飽受言語上的暴力，點解要自己咁辛苦？

12. 打女人的男人

呢種人一旦發起脾氣，芝麻綠豆大的事，都可以鬧得天翻地覆，除非你有當沙包的興趣，否則婚前就有暴力傾向的人，在婚姻中一定是一顆計時炸彈。

13. 好食懶非的男人

男人可以無錢，但唔可以無上進心，否則將來日子點過？唔通要靠女人養？日日不務正業，無所事事，或做邊一行都不長久的男人，實在嫁不得。

14. 過分沉迷不良嗜好的男人

有嫖賭飲蕩吹傾向的男人，固然唔洗諗，但即使是酒癮或煙癮過大，或太沉迷投機炒賣，都唔係咩好事，最怕係婚後變本加厲，遭殃的只會是你。

15. 黑道中人的男人

唔好被電視劇洗腦，以為江湖人物都是義字行頭，即使你確信佢對你有情有義，但嫁給一個會作姦犯科、惹事生非的麻煩製造者，就算唔洗幫佢收拾爛攤子，都要終日提心吊膽，邊會有幸褔可言？

16. 奸詐狡猾的男人

機心重的人，一般比較冷酷無情，而且唔會真誠待人，為求達到目的不擇手段，甚至會利用身邊人，實在難以睇穿佢，對你是真心定假意，長遠落去，只會演變成愛猜疑的心理，實在嫁不得。

17. 用情不專的男人

雖則世上並無不「花心」的男人，但要有「自制力」的男人，女人要的只是男人的專一。江山易改本性難移，婚前喜歡到處留情的花心男，唔好妄想佢婚後會為你而改變，何苦用一生去苦等？

18. 開口埋口「阿媽話」的男人

咩事都由阿媽出面的裙腳仔，又依賴又無主見，何況阿媽叫佢行佢就行，唔夠膽企，同佢結婚，你肯定大把冤屈氣要受，除非你肯做佢第二個阿媽啦。

19. 過分大男人的男人

唔浪漫唔細心都算了，但要你百分百服從的大男人，開口埋口只會話湊仔係女人的天職，洗衫煮飯是女人的責任，衣來張手飯來張口，將老婆當工人咁駛，收工同朋友食餐飯，講個電話，都要管你，嫁得畀佢，肯定心力交瘁。

20. 對他毫無感覺的男人

一個男人由頭到腳都無問題，五官端正、事業有成、細心體貼，可以話無甚麼可以挑剔，但你就係對佢無感覺，同佢去街完全唔上心，只係唔甘心放過一個條件這樣好的老公人選而已。不過算喇，你都係放過佢吧。