Spaghette House意粉屋
姪女途經香港兩日,咁啱呢兩晚我都有事,唔同得佢食飯,惟有改食午餐。
熟識我嘅朋友都知我一向唔食午餐,尋日午餐同佢食左個米線,攪到夜晚果餐都食唔落!
是日午餐:
意大利菜湯/蒜茸多士
姪女見倒我呢個湯,問我佢同羅宋湯有咩分別?外表冇咩分別、味道都冇咩分別,最大分別係羅宋湯係有牛肉嘅。
至於片蒜茸多士,我地都覺得好硬!結果佢半片都食唔倒,我食左一片。佢問:「咁硬你都食?」
答:「證明我係好捱得嘅!佢硬得過我條命咩?」
埋單時,侍應攞嚟衰!問:「啲食物如何?」
姪女:「啲蒜茸多士好硬!」
侍應表現好驚奇:「呢啲係多士喎!」
姪女:「多士就應該咁硬架!」跟住攞剩低果片響檯度敲到「咯、咯」聲俾個侍應聽。
侍應:「哦!我叫佢地留意吓啦。」
之後我同姪女講:「如果我係果個侍應,我會答:我地預啲客將佢放落湯度浸稔左食架!」
西班牙豬扒飯+凍咖啡
呢杯凍咖啡係隨餐附送嘅,姪女改左飲意大利咖啡Cuppercino,加十八蚊,佢覺得好唔抵!
我呢碟,豬扒都幾稔,但係啲飯唔得!我一向唔鍾意食意大利飯,嫌佢硬。見餐牌寫住係西班牙飯先至叫,但係啲飯都係比較硬----加上我一向唔嗅米氣,但係又唔想食意粉,即使今日冇食早餐都食剩啲飯!
姪女叫左磨菇腸意粉,成碟食晒;佢話唔係咁好食,但係成碟食晒都仲有啲意猶未盡。
真係唔知點解,依家出街食嘢總係總得啲食味差左---即使係同一間食肆!
尋日午餐響「景霖」食米線----太子女問:「好耐唔見你喎!」
我:「係呀!我唔食午餐嘅,所以唔會響呢啲時間嚟食嘢嘅。」(其實我真係好耐冇去呢間食,呢個答案係想大家好過啲啫。)
講真,「景霖」啲嘢真係幾好食!雖然比起以前都係差左啲,但係我姪女仍然覺得佢啲嘢好好食!佢叫左勁辣米線(冬菇、魚腐、墨魚丸)加兩隻麻辣雞翼;我打破傳統,叫唔辣米線(豆卜、芝士腸)加兩隻香草雞翼。
打破傳統係因為過去我祇叫冬菇、豬肝同腩肉做餸。第一次叫呢兩樣嘢,又幾好食---雖然芝士腸係現成嘢,咁都要佢搵倒呢種咁好食嘅腸至得架!
佢啲冬菇一向整得好味,不過,我還覺得比之前差左(可能係買左比較便宜嘅貨),但係如果冇比較過(好似我姪女咁),都會覺得好好食!
好彩,最驚你爭食!
鬼佬飯唔好食!佢地唔識煮飯,用水烚熟的米!
今日放出來的野我全部都唔食!
我其實都好少食香腸呢類嘢,明知冇益,不過佢真係幾好食!
妳真係寫得啲食物好詳細、除了芝士腸、我樣樣都食!