大家樂、大快活

想當年，行完街、睇完戲，好多時都係去呢兩間快餐店食晚餐-----冇計啦！窮吖馬。

不過，今時今日，食快餐對於經濟條件唔係咁好嘅人經已算係奢侈品。依家去兩間「大」記食個晚餐，閒閒地一個人都要五十蚊---隨非你唔飲嘢！

但係，你去茶餐廳可能三、四十蚊都食倒碟飯，仲唔駛自已去拎添！

不過，去茶餐廳食個早餐又分分鐘貴過食個午餐----普普通通食個早餐都接近三十蚊(你去名寶石之流更加不上此數)。所以，早餐或下午茶去呢兩間快餐店食便比茶餐廳便宜。

以前是先有「大家樂」、再有「大快活」的。初時，總覺得「大快活」的衛生情況比前者差！因為那時我經常會幫趁銅鑼湾總統戲院果間「大快活」，因為人流多，很多時坐低後，上手食剩嘅嘢都未執！你叫啲清潔姊姊清理張檯，佢祇係用毛巾將啲骨呀...掃落地，所以那時我覺得「大快樂」做得好啲。至於食物---去得快餐店，其實對食物質素都唔可以有太大要求。

其後，「大快活」後來追上----無論店鋪嘅設計同食物質素都改善左！早幾年我響灣仔工作，公司樓下間「大快活」食物很不錯！我間中放工後去果度食個「沙薑雞套餐」---有一碟雞、大小煲老火湯、一碟油菜、一碗飯同普洱茶，當時賣三十七蚊。我一個人絕對食唔晒，兩個人食啱啱好！而且，果陣啲雞好好食。

但係到我差唔多退休果陣(即年多前)，同一個餐價錢都係差唔多，但係份量剛夠我一個人食，而且果碟雞嘅味道經已此情不再矣！

今時今日，呢兩間兄弟店經常響店鋪嘅裝修上作大比併----佢地鬥靚唔緊要，最弊用嘅錢都係羊毛出在羊身上，要啲客嚟同佢地埋單啫！與其係咁，不如響食物質素同價錢方面多花心思好過。