為「May姐」抱不平！

雖然早幾日我批評過「May姐有請」呢個節目，不過我亦講過佢係有啲無辜嘅！

無辜係因為港視單嘢佢俾人拎嚟做話題。今日生果日報再拎佢嚟大做文章，搵晒果啲曾經做過飲食節目嘅主持嚟就呢個節目講評語。

傻嘅，雖然話同行如敵國啫，邊個會咁蠢去批評第二個主持吖？呢個行頭咁窄(如果唔係，港視班員工、特別係俾港視高薪挖左過當果啲藝員點會咁大反應)，多個電視牌、即係佢地多左老板爭，咁過吓塘啲魚至有機會大架馬！以前無線獨大----做藝員嘅為左要有知名度、即使無線條件苛刻都唔敢走！

依家世界輪流轉啦！稍為有啲演技嘅藝員都走得七七八八，再加埋依家啲編劇質素每況愈下，攪到蜀中無大將，無線連「海味」都要搵番嚟做主角，睇嚟無線好快玩完！

講番「May姐有請」，今晚播最後一集，接住落嚟播黃淑儀主持嘅「吾淑吾食」。我唔知個節目會唔會又係搵左雞汁做贊助商，如果係嘅，我諗無線要拿拿林拍過；因為如果個節目仍然仿傚May姐個節目咁嘅硬銷方法，我相信個節目唔駛行出街就經已扑街！

點解我要為May姐抱不平？佢除左啲笑聲我不敢恭維外，佢果種硬銷方法，其實好多烹飪節目都有出現-----李錦聯有一段時間煮親餸都落李錦記調味醬料、肥媽煮親都係百記豆腐、Annie師父味味都係榮記臘腸....雖然話係贊助個節目啫，如果味味餸都用贊助商嘅嘢我係會拒睇嘅！

有啲男主持做節目係為左擴大自己嘅飲食皇國、有啲為左溝女主持...咁講起上嚟，May姐罪行最細架啦！

所以，我覺得佢係適逢其會，唔好彩囉！