少年夫妻老來伴！

以前盲婚啞嫁年代，一般人結左婚、即使夫婦感情唔係咁好，都抱住----算啦！捱大啲仔女，老時有個人陪伴左右，咁就過一世啦！似乎呢個就係人生在世不變嘅定律。

一直都以為，一段婚姻如果維繫倒有廿年(果陣基本上都仔大女大咯)都應該幾穩陣架啦；誰料：

一. 有位女舊同事早兩年六十歲退休，退休冇耐就聽倒佢離婚嘅消息；

二. 一位接近退休嘅女舊同事親口告知，佢剛離婚，還告知兩夫婦一早貌合神離，祇等子女都完成大學才正式離婚；

三. 一位四十多歲的舊女同事告知我佢離了婚(佢老公退休冇几耐)，原本佢冇諗住通知人，祇因當晚有舊同事結婚飲宴，佢擔心有人響婚宴度問起佢前夫嘅事，才事先講定；

四. 又一位舊同學，雖然冇離婚，夫妻亦冇大問題！但係佢丈夫性格內向，冇咩朋友，呢幾年兩人都退左休，子女又不同住；響屋企你眼望我眼，佢丈夫唔鍾意佢出街，所以我地每次聚會、同學都要事先同佢老公講兩個鐘頭耶穌兼且食完飯雞咁腳要走----慘過灰姑娘！

心諗：互相容忍幾十年，都祇求老來有個伴啫，但係結果一個二個要搵番啲舊同事/書友仔嚟陪，諗落係咪灰色...哈  哈  哈呢？

當然，都有啲人好好彩，年青時冇結婚，反而四五十歲先至搵倒個老來伴；但係呢樣彩數唔係人人可以擁有！講真吖---後生果陣就夠膽講：不論佢生老病死都不離不棄啫(果陣大家都年青，冇人知道日後邊個死先、邊個病先)！但係到左四五十歲，咩嘢病都出齊，有幾多人再夠膽作此承諾？到左咁嘅年紀，冇錢嘅搵鬼去養你；有錢嘅，又驚對方係愛你啲錢而唔係愛你！

唉！