老娘收山！

舊同事來電，神神秘秘問我得唔得閒傾吓計？我仲以為佢有啲咩嘢私人嘢同我傾，原來唔係。佢同我講，有份筍工---短期工、一年期，問我做唔做？

我：「吓！唔好攪我囉掛。」

同事：「你聽埋先啦，人工好高架！$$$$$$一個月，合約完左仲有約滿酬金。」

我：「聽落真係好吸引。不過，我hea左年幾；同呢份短期工相關嘅工作更加係八年前嘅事。你唔好玩我啦！搵啲啱啱退休、未dum懶個身果啲人啦！咁嘅人工大把人飛埋嚟啦！」

同事：「係就係好多人想做，但係我唔想搵佢地做！我同你合作過，我對你有信心。」

我：「噓！百步之內又豈無芳草？」

同事：「你舉例吖，有咩嘢芳草吖(跟住我講左幾個人)？你都係考慮吓啦！」

我：「以一份全職嘅工作，一個月得一日假，我係唔會考慮嘅；如果係返半日或者一星期返兩三日，錢少啲都仲可以考慮！」

同事：「我要同上頭傾吓，睇吓假期同返工時間可唔可以將就吓。不過，你都係再認真諗吓啦！」

收左線，再諗真啲，就算所有條件都就晒我，我都係唔應承得！前一份工搵我做果陣都話係三個月短期工，結果我做左兩個星期，機構就想我轉做全職。果陣仲返緊演藝夜間課程，我為左想佢地知難而退，同佢講我逢星期三要早走喎！結果佢都應承。果份工做左年幾，係我自己辭職轉左第二份工----轉呢份新工做係要還人情債，一做就做左六年。

舊年退休後強積金我都攞番晒，原本以我呢個年紀係未攞得返嘅，條件係我要做個宣誓聲明唔再做工先攞得番！雖然再做都唔係唔得，不過出乎矣、反乎矣呢啲行為，唔係我嘅性格囉！

再者，對上果份工我同老板講：「我係時候退休抖吓啦！」如果我再做工、點解唔繼續幫佢做呢？咁做法好容易日後連朋友都冇得做架。

仲有，我計過條數----做工交好重稅架！計埋一年得九個月人工，點計都係唔值得。

唉！叠埋心水唱歌好過啦！