最佳女主角

無線剛播完嘅節目，接住落嚟個節目係「慘不忍睹三小生」，睇左15分鐘，頂唔順要轉台！

去年黎芷珊憑「最佳男主角」節目攞獎，果個節目我一集都冇睇過；正因如此，今輯都間中睇左幾集。老實講，如果上次「最佳男主角」都係咁，真係唔明點樣可以攞獎！

我睇左訪問葉玉卿、羅蘭同陳慧琳果幾集。葉玉卿唔知係咪因為久居外國，廣東話唔流利、抑或佢有太多嘢隱瞞，唔講得出嚟，總覺得成集帶人遊花園，不過遊完都係唔知佢講咩(所以睇完上集、都冇睇下集)？陳慧琳果集講來講去，都係講佢同個經理人嘅關係，雖然佢講到聲淚俱下，我太冷血啦---感受唔倒！又冇睇下集。

反而係訪問羅蘭姐果兩集，我覺得好真！呢啲節目珍貴在你可以知道一啲你平日唔知嘅嘢。

上個月我姪女回港，問我有冇睇呢個節目？點答好呢？話有又唔係、話冇又唔係！

我：「點解咁問？」

姪女：「你有冇留意黎芷珊帶果啲頸飾？好靚！」

我：「哦！好誇張果啲吖馬。」

姪女：「我諗黎人緣好好，所以有朋友幫佢設計！」

我：「唓！駛唔駛呀，無線服裝部人人都識做整啦！」

姪女：「但係點解唔見其他劇集女主角帶啲咁靚嘅頸飾？」

我：「一來咁誇張嘅頸飾依家先至流行、二來響劇集度衣著太誇張亦唔好！但係黎芷珊係做主持，所以可以誇張啲。」

一個節目令人留下印象，唔係內容，係主持人嘅衣著！係成功定失敗？