肉碎燴海花膠

上星期響「大棧」買左兩包海花膠。同樣價錢有兩種---一種泰國、一種越南。據店員講：一種較稔、一種較爽。佢建議我買較稔果隻。

最簡單嘅食法咪用嚟煲湯囉！不過，煲完湯好多時剩番啲渣，所以我試吓呢個方法----通常我會用沙爆魚肚嚟整。

始終第一次買海花膠用，所以我先用薑水出水15分鐘備用。

材料：

海花膠一包(人少嘅半包都可以)

豬肉碎2兩(其實多少好隨意)(下生抽、糖、生粉、麻油、胡椒粉醃過)

蝦乾十隻浸軟，水留用

冬菇浸軟切絲一隻(用少許糖及麻油拌勻)

唐芹

上湯

薑片

做法：

一. 燒鑊將豬肉碎炒至八成熟。(當然再懶嘅一齊煮都得！不過肉碎過熟會鞋、唔怕煩嘅又可以加啲乾蔥碎一齊炒)

二. 燒油爆薑片、冬菇、蝦乾炒一會，下海花膠及上湯(及浸過蝦乾的水)，燴煮至蝦乾稔，下肉碎及唐芹煮滾，試味，埋薄芡。如不夠味，可加少許魚露或生抽。

註：

海花膠口感似花膠、又有啲似沙爆魚肚。因為本身冇味，一齊要用濃湯嚟煮。