三個「醜官」的遭遇

老曾年代，上樑不正下樑歪，出左三位大醜官----老唐、老許同老湯。佢地幾單大案有咁啱響呢幾日陸續有結果。

飲得杯落

老唐個結果最飲得杯落-----二千幾呎僭建左咁多年祇係罰款十一萬了事。老友記：一於齊齊僭建啦!大家都做就無人會舉報，有關部門啲人懶到出汁，即使見倒都當睇吾倒---懶得做啦!

真係咁吾好彩遇著位包青天嘅(甘你真係吾好彩，百年難得一遇嘅都俾你撞倒)，都吾緊要！有數得計，罰款仲平過交租---你拎老唐呢個案例出嚟就得啦。罰完、拆完、驗完又再僭建，下次查出可能係幾十年後嘅事咯。

冇被罰

空心老倌身為前高官，年薪幾百萬，退休後每月唔駛做都袋八萬，仲同時響「新記」有糧出、住豪宅、養馬、食珍饈，竟然可以欠成億債，被宣布破產(死啦！一個連自己財政都管唔掂嘅人、當年係負責管理香港財經嘅高官)。嘩!咁樣其實等於冇罰佢。破左產可以繼續奢華---著嘅、食嘅、住嘅同行嘅都係最豪華嘅、祇要冇響自己個荷包拎出嚟，有人幫你埋單就冇問題。

靚女破產就話搵人包起啫，佢都算係男人一個吖，竟然有人包起咁多年，都算極品咯！

串到爆

老湯罪證確鑿(不過唔明點解咁耐先攪掂個報告)，呢兩日俾人遺憾佢，老湯竟然可以厚顏無恥到問句：「錯了！錯在那裡？」

如果佢冇錯，就係政府錯囉！邊個叫你當年有眼無珠僱用佢？佢貪飲貪食，行內無人不知，但政府不但扮唔知，仲要升到佢咁高級---退左休仲委任佢做一個反貪污部門嘅阿頭：真諷刺！

呢件案結果未知。觀乎老唐果單嘢雷聲大、雨點小(果啲罰款唔夠錢請咁多人審呢單案)，我估都係不了了之，可能口頭批判吓就算！不過，萬眾期待就梗係罰佢冇左份長糧、噁番落左袋嘅大糧(梗係啦！納稅人啲錢嚟架)，最好就係罰埋佢坐監幫佢戒酒啦！