珍藏照

天氣真的涼了，尋日是我的勞動日----將衣帽間嘅嘢重新整理：晒衫、揀走啲唔要嘅衣物、收埋啲家用小電器(風扇、空氣清新機.....)。

做左成日，晚上成個人散晒！

在收拾期間，俾我搵倒張陳年舊照。當年衛奕信爵士剛上任，巡視香港十八區；呢啲經已係廿幾年前嘅事，當日我被指派陪住港督夫人(當然離唔開會俾佢考口試)。

熟識我嘅人都知我甚少笑(可能我嘅經歷令我笑唔出掛)，特別係明知有鏡頭對住嘅時候！還記得當年換新身份證的時候，我咁啱響果個部門工作，當然趁機影番張靚相做身份證啦---傻啦！個人唔靚、除左後天技術外，點都唔會變靚左架！

當日影相嘅時候，負責攝影位同事猛咁叫我笑----哥哥：對住熟人，更加笑唔出呀！結果-----有幾位同事響對面扮唔同嘅表情嚟引我笑！終於完成呢個創舉啦(咁似烽火戲諸侯嘅！我咪似個奸妃？)。可惜吖，後來換智能身份證，響做證個counter影埋相，冇呢支歌仔唱啦！

又講番前港督巡區，果日新聞處負責攝影位哥哥，咁啱又係我嘅舊同事。當日佢做完嘢返寫字樓揀相，居然發現影倒張我笑嘅相，即刻打電話告知，同時專登晒左呢張相俾我。

廿幾年前嘅我，見倒你都唔會認得，所以又不妨上載俾大家睇吓吖！