驚餐死！

今朝一早去牛頭角覆診兼針灸。

睇完醫生，入去治療室準備針灸。今次第三次啦，其實對我嚟講都唔覺得有咩問題，誰知果位中醫入到嚟(我當時扒響度)，遲遲唔覺佢施針。跟住佢自言自語講：「咦！呢部新嘢嚟播(睇住部針灸通電機)，我都未用過，等我研究吓點用先！」

等左差唔多五分鐘，佢開始落針。通常佢落完針就交俾個助手做通電嘅工作。聽見佢同個助手講：「呢部機我都未用過，正負兩極啲電線又唔明顯，你小心啲用呀！」

嘩！你都未識用，你位助手更加唔會識啦！我個心真係驚架，佢咁樣講法，如果正負兩極掉轉左挾會點？我又唔知佢預設過電時間，萬一佢唔識用，果部機唔自動停，咁又會點？

當時肉隨砧板上，又唔敢講咩嘢，淨係個心好驚。結果....算係有驚無險啦！不過，我覺得果位中醫唔應該俾我聽倒呢啲嘢囉！

早兩星期師公生日，師伯瑛姐同我講：佢依家好少唱歌，佢儲存埋好多曲詞問我要唔要？

我答：「好難講喎！因為唔知你有啲咩嘢曲詞。不過，反正你都諗住唔要嘅，咪即管俾我篩選吓，啱用嘅我咪要、唔啱用嘅，我同你掉左佢囉！」

佢尋晚問我今日可唔可以去佢屋企攞？因為佢約左人十二點，我要趕響十二點前去到佢屋企，所以覆診完咪「打的回府」，拎架車仔去土瓜灣攞嘢囉！

瑛師伯係一隻候鳥，同師公一樣----香港、加拿大兩邊走！去年大家食飯，我講起想學「阮」，瑛師伯同我講佢屋企有件樂器，好似係「阮」，叫我上佢屋企睇吓係唔係？結果證實左果件樂器係「阮」，佢仲送左俾我用添；今次回港，佢執完屋又問我接唔接收佢珍藏左幾十年嘅曲詞？我呢啲算唔算係「鳳凰無寶不落」呢？咩嘢都要左先，唔啱至算！拎左番嚟揀過，原來有好多曲我都冇嘅，又要做曲書啦！佢仲俾左十幾廿盒粵曲/粵劇影碟俾我，部份係完全未開封嘅！

哈哈！你估佢下一年佢返港回會唔會問我：「阿VAN，我有間屋你要唔要呀？」係就發達咯！

講番今朝「打的」。果位司機大佬，由我上車到落車、少說都有十五分鐘，佢未停過講電話，雖然佢用緊免提，但係我都好懷疑佢咁做合唔合法----佢部車有兩部Samsung Notes ，一部 LG同一部  Nokia，共四部機，全部棟晒響司機視線前面。大家都知Samsung Note幾大部架啦！棟響佢面前，你話冇影響視線真係搵鬼信！

從佢嘅對話，我好肯定佢仲係一隊的士嘅管理人，佢不斷接電話跟住安排車輛去接載其他乘客；得閒又同第二啲司機傾計，總之未停過！我驚係因為一個人心難二用---佢竟然可以三用、四用，我真係懷疑佢有冇留意路面情況架！你話唔驚就假---既驚佢行錯路、又驚佢到步唔識停、更加驚出意外！唉，所以冇咩必要真係唔好「打的」，正式係貼錢買難受！

嚴格嚟講，我係一個「冇膽」之人嚟架！