大操

我相信唔唱粵曲嘅人未必明白咩嘢叫做「大操」？其實等如我地講嘅rehearsal，即係正式表演前來一之預演，一般是所有有份表演的人響表演台上試吓走位、企位....作最後定案。

我知做折子戲嘅朋友會有「響排」，意思差不多；而企棟棟唱，我地會有「大操」。一般會安排響正式演出前(果陣所有唱口對要出騷所唱嘅歌應該已經純熟)，安排在某曲社以出騷時所用的主要音樂師父與唱口正式夾一次，如果有咩嘢問題，音樂師父同唱口要響未來果幾日調較吓，以便正式演出前可以有最好表現。

可能你會問，何解平時唔夾？一般而言，正式演出果啲師父係由統籌節目果位人士搵嘅，佢地本身未必經常夾開，亦未必有曲社，如果動不動要組合佢地一齊開唱局皮費好貴，而唱口每次亦祇能唱半首歌，亦未必人人樂意咁做！因此，通常都係各有各安排(譬如北上)自己操熟首出騷曲，響大操夾一次，咁就出台架啦！

下星期出騷，前日傍晚大操。因為一早知道樂師中有失明人士，統籌人亦一早關照左要唱舊曲，因為新曲對失明人士有困難。因此，我和拍檔一早講好，雖然唱「重台泣別」呢首舊歌，我平時唱法與原唱唔同，我都盡量用番原唱嘅唱法，咁樣對大家都安全啲。

誰料....開頭奏果幾粒音(六..六..工..尺)經已覺得啲速度個個唔同！不過好快大部份都夾倒。但係當我唱段「反線二王」(呢啲都係大文大路嘢，大部份粵曲都有架啦)時，發覺果位頭架完全唔知拉咩---成段都跟唔倒(其實我跟足譜唱，佢唔駛追腔，冇難度估喎)！最攪笑係，果位仁兄係開眼架，反而係啲失明人士、因為靠聽，反而跟得倒！死啦，到時聽邊個好呢？

拍檔未唱之前問我：因為佢高音一向麻麻，佢話老師建議佢最尾果句用低音唱，問我好唔好？

我答：「未聽過你用低音唱，答你唔倒！不過，你之前幾次都係用高音唱，都唔係好大問題啫！反正我地唱尾曲，大把時間剩(其他人走晒，冇人同你爭)，到時你呢句高音、低音都唱一次比較吓囉！」

結果...我地都覺得果位頭架奏段「反線二王」好唔得，所以一唱完我打眼色叫拍檔快啲走，俾時間個統籌同佢講耶穌---奏成咁聾嘅都聽得出有問題啦！佢唔攪掂佢、到時佢死咋。

跟住同拍檔去食嘢順便做「死因研究」。該次佢用左低音唱尾果句，我同佢講：「你都係唱番高音啦！一來唱低音唔好聽---對於一些熟悉此曲的聽眾來說，聽落以為你後勁不繼：跌watt！反正你唱高音祇係差啲啲，無謂搏！」

佢都認同，到時我地要自求多福啦！

在此，亦要向失明人士致敬兼致歉---冇諗過佢地叻過開眼果啲人！