呢種男人，唉！

亞視尋晚播左套粵語殘片----紅線女、吳楚帆做嘅「天長地久」。

故事大致係講吳楚帆入贅豪門，外父俾佢做酒店經理；但係佢每個月嘅人工都係直接入落佢同佢老婆嘅戶口，提款要兩個人簽名----咁即係啲錢佢有得睇、冇得駛！祇係每個月有一百幾十蚊零用錢袋袋。

吳那位患病的母親和大到可以嫁得人嘅妹都係住響佢外父家，因此受盡白眼。

一日，外父對吳講，要佢個妹嫁給另一戶對佢經濟地位有幫助嘅人家。佢個妹唔肯嫁，寧願同阿媽搬出去住，但係吳又付擔唔倒佢地出去住嘅支出----佢個妹死架！既然唔想嫁果個人，自己牛高馬大，點解唔搵嘢做自力更新呢？

結果，吳個阿媽自殺、佢個妹一走了之(冇交代佢結果點)！

吳在偶然的情況下認識窮家女紅線女，兩人一見鍾情。吳趁妻舅忘記關上夾萬，取了二萬圓與紅線女私奔過澳門生活(紅唔知佢已有家室)----佢認為自己銀行戶口存了四萬多圓，咁佢佔一半、即係果二萬蚊係屬於佢嘅----有冇攪錯？咁諗嘢都得？佢冇離婚架，香港同澳門咁近，佢以為可以一走了之咩，佢當個老婆死架？

吳以為以佢在酒店行做左咁多年，搵番個經理做唔難，結果真係經朋友介紹搵倒份經理做；但係都未上工，未來老板見倒報紙登出佢盜竊嘅聲明後，立刻唔請佢---都話香港同澳門近架啦！佢咁天真以為佢外父會放過佢、佢老婆又會放過佢？

結果....做茶餐廳佢頂唔順(覺得辛苦)，做咕哩佢冇力，更為了男人自尊，唔想老婆出嚟做工-----死架！佢咩嘢唔得都叫做識字吖，果個年代幫人寫信都搵倒餐食啦！

後來，佢見報載佢外父退休，打算將酒店交俾個孫(即吳個仔)打理。佢諗住可以父憑子貴，從入酒店業，所以堅持要回港。

紅為了成全吳，送他上船後便跟姐妹走埠，最後紅遍東南亞。

吳回港後，發覺環境根本唔容許佢回頭。當他返到澳門時，發覺已人去樓空。之後佢一直失業(冇交待，可能佢根本冇搵過工做)、饑寒交迫，百病纏身...

紅最後在澳門巡迴演出，重遇吳，亦不嫌對方貧賤；祇是吳不想連累紅(未私奔果陣唔咁諗)，決心離去，最後是紅在街上追上吳而終結---我假設佢地最終走番埋一齊！不過，如果吳果種思想冇改變、如果佢仍然諗住做經理嘅風光，唔識得面對現實，最終都係不歡而散嘅啫！

冇諗過以前啲殘片都咁長，播左兩個半小時---撇除廣告都有兩個鐘。