2013無線電視頒獎禮`

往年無線電視頒獎禮，事先經已傳聞邊個邊個會攞獎---結果邊位邊位又真係攞倒獎！不期然俾人一個感覺係可以用簽約達到攞獎嘅結果。

今年可能因為風頭火勢掛，無線唔可能再做出一些令人覺得佢地係造馬嘅頒獎禮，因此，今年得獎果啲我估中左八成：田蕊妮得獎，正如佢話齋，係遇倒一個好劇本，令佢有得發揮！黎耀祥攞唔倒獎亦係衰在劇本，以「神探高倫布」呢啲劇本一早應該拎去堆田。真係成也劇本、敗也劇本了。

我早幾日都講過，江美儀過左無線，有如脫胎換骨--化粧靚左、演技亦明顯睇得倒；除左播緊套「My盛Lady」，之前套「名媛望族」亦有不錯的表現，反而套「衝上雲霄二」我覺得麻麻！不過，佢同田蕊妮致詞時，擦無線鞋之餘、眨亞視的言論我不以為言，始終一場賓主，山水有相逢，無必要去到咁盡。

視帝由黃子華獲得，我真係覺得跌眼鏡架。雖然我都欣賞黃子華，但係佢套劇都未播完！論演技，我覺得王祖藍在「表弟，你好嘢」中表現得更好--雖然我都唔鍾意睇佢！正如某頒獎嘉實講：「(衝上雲霄二)囊括晒無線的靚仔靚女、而(表弟，你好嘢)則包含晒一眾醜男醜女(郭俊安當然唔係)。」呢位嘉賓真係講出我心底話。

亦因為如此，最受觀眾歡迎獎由張智霖獲得---觀眾係鍾意靚仔靚女嘅！我姪女一見倒Chilam就暈晒浪，咁由觀眾一人一票選出嘅，佢真係眾望所歸，有得留低啦！

許紹雄演技一向不俗，但係如果以「My盛Lady」呢套劇而獲獎我並不認同，反而阮兆祥響「巨輪」同呢套劇中有很好的表現。

以上純屬個人意見，你唔需要認同！